Almatyda syrtqy jarnamaǵa qatysty orynsyz aıyptaý taǵyldy
Jıynǵa Sybaılas jemqorlyqqa qarsy is-qımyl agenttigi Almaty departamentiniń basshysy Danııar Taýmurat qatysty.
Onyń aıtýynsha, departament pen kásipkerler palatasyna túsetin shaǵymdar sany azaıar emes. Basym bóligi jergilikti basqarmanyń jarnama ornatý salasyndaǵy qyzmetine qatysty bolyp otyr.
Kásipkerler kóbinese basqarma jarnama aqysyn shamadan tys asyryp jiberedi degen shaǵym aıtady. Onymen qosa, jarnamaǵa qatysy joq obektilerge de qosymsha aqy alyp otyrady. Máselen, bankterdiń biri dúken ishindegi «bir kúnde jańa kólikke nesıe», «komıssııa 0 teńge», «tólem termınaly» sekildi jarnamalar úshin tólemaqy suraǵan. Sot isti kásipkerlerdiń paıdasyna sheshti. Alaıda, ony oryndaý tek Departamenttiń aralasýynan keıin ǵana qolǵa alynǵan.
Memlekettik baqylaý salasynda jarnama ornatý aqysy boıynsha naqty ereje joq. Resmı organdardyń habarlaýynsha, bıylǵy 8 aıdyń ishinde 500 myń teńgeden joǵary somada ákimshilik hattama toltyrylǵan.
«QR Jarnama týraly zańynyń 17.2-babyna sáıkes jergilikti atqarýshy organdar óz quzyretine oraı jumys jasaıdy. Syrtqy jarnama qoıý normasyna sáıkes kásipkerlerdiń foto jáne vıdeo jarııalanymdary baqylanyp otyrady. Kodeks boıynsha baqylaý formasynda basqa normatıv kórsetilmegen. Syrtqy kórneki nysandardy syrtqy jarnamaǵa jatqyzý ádistemesi bekitilmegen. Reglamenttiń joqtyǵynan quqyqtyq túsiniksizdik týady», - deıdi Danııar Taýmurat.
Sondaı-aq, syrtqy jarnamanyń aýdany qatyp qalǵan ólshemdermen emes, jaı kózben ólshenip júr. Osy sebepti alynatyn tólemge qarsy pikir bildirýshiler kóp.
Jaqynda júrgizilgen monıtorıng bul ádistiń Kásipkerlik, Salyqtyq Kodeks pen Jarnama zańyna qarama-qaıshy ekenin kórsetti.
«Qazir Almatyda ruqsatsyz ornatylǵan syrtqy jarnamaǵa qatysty basqa ádiske kóshtik. Basshylyq «Almaty genplan» JShS-men zerttelgen foto jáne vıdeo túrindegi syrtqy jarnamaǵa qatysty faktiler qataryn jarııalady. JShS qyzmetkerleri stendtik jarnamanyń materıalyn, onyń aýdanyn vızýaldy túrin anyqtap, bekitý jumysy kásiporyn sýbektilerine habarlaýsyz jabyq túrde júzege asady. Tekserý qorytyndylary boıynsha tikeleı basshylyqqa jiberiledi. Olar óz kezeginde salyq organdaryna tóleýshiler týraly dáıekterdi kórsetedi. Salyq organdary kórsetilgen faktilerge súıene otyryp, tıisti sharalar qabyldaıdy», - deıdi Danııar Taýmurat.
Departament ókilettik oryndarmen usynylǵan zań aıasynda Kásipkerler Kodeksiniń 131-baby 1-bólimine qarama-qaıshy keletinin eskerdi. Sondaı-aq, memlekettiń kásipkerler isine zańsyz aralasýyna bolmaıdy.
Sáýlet jáne qala qurylysy basqarmasynyń basshysy Nurlan Ýranhaev barlyǵyna kináli - mamandardyń jetispeýshiligi ekenin atap ótti. Onyń málimetine sáıkes, 20 qyrkúıekte basshylyqqa 10 túrli memlekettik qyzmet boıynsha 39933 joldama kelip túsken.
«Kún saıyn basshylyǵymyzǵa 300-ge jýyq hat keledi. Ár jumysshyǵa bir kúnde 8 hattan tıedi. Barlyǵy sáýlettik josparlaý tapsyrmasyn (SJP) berý, jarnama jáne basqa da zańdarǵa qatysty hattar. 20 qyrkúıekte SJP alýǵa 7267 ótinish kelip túsken, olardyń 2593-i qaraldy. Osy jyldyń aqpanynan bastap Doing business aıasynda bas tartqandar sany azaıyp, jumys kóbeıgen. Áý basta tehnıkalyq qyzmet kórsetýshiler laıyqty monopolııasyn alatyn. Qazir munymen biz aınalasamyz», - deıdi Nurlan Ýranhaev.
Onyń oıynsha, árbir bólim men aýdanǵa kem degende 3 maman kerek. Shtattyń ulǵaıýyna qomaqty somanyń keregi joq. Alaıda, Úkimet bekitken shtat sanynyń normasyna sáıkes ony qolǵa alý múmkin bolmaı otyr.
Qalanyń soltústigindegi Raıymbek dańǵyly men Almaty-1 vokzalyndaǵy jarnamalar Qoǵamdyq keńes músheleriniń zyǵyrdanyn qaınatty. Jarnamalyq jazbalar jol shetterinde ońdy-sońdy qoıylǵan. Sondaı-aq, taǵam attary men túrli-tústi metall ataýlarynan saýatsyz jazylǵan mátinder jıi kezdesedi.
«Jol jıegindegi mańdaıshalardyń máselesin salyqtyq ınspektsııaǵa jiberdik. Alaıda, bizden kásipkerlerge qysym kórsetpeýimizdi suraıdy. Mátinderdiń mazmunymen Tilder basqarmasy aınalysady», - deıdi N. Ýranhaev.