Almatyda syrtqy jáne ishki týrızmdi damytýdyń jobasy tanystyryldy
Bıyl Memleket basshysy Nursultan Nazarbaev Alakól aýdanyna barǵanda 2025 jylǵa deıingi týrızmdi damytýdyń memlekettik baǵdarlamasyn jasaýdy tapsyrǵan bolatyn.
Osyǵan oraı QR Mádenıet jáne sport mınıstrligi zań jobasyn jasaýdy bastady. Qujat ashyq túrde talqylaýǵa shyǵaryldy. Qazir oǵan qatysty 300-den astam usynys berilgen. Sondaı-aq, týrıstik bıznes salasynyń sýbektilerimen 40-tan astam kezdesý ótkizilgen.
Dál qazir zań jobasy memlekettik organdardyń qaraýynda jatyr.
Atalǵan qujat eń aldymen týrıstik terrıtorııalardy belgileý, vızalyq rejimdi jeńildetý, elektrondy vızany engizý, avıabılet baǵasyn arzandatý, týrızm salasyndaǵy ulttyq operatordy anyqtaý jáne onyń mártebesin aıqyndaýǵa baǵyttalǵan.
Mamandardyń aıtýynsha, memlekettik baǵdarlamanyń negizine 10 týrıstik oryn: Alakól, Almaty oblysyndaǵy taý shańǵysy kýrorty, Baıanaýyl, Balqash, Kaspıı teńizi, Shalqar-Imantaý aımaǵy, Şýchınsk-Býrabaı kýrorttyq aımaǵy engen.
Atalǵan aımaqtarǵa jylyna 3,5 mln týrıst keledi. Jańa zań jobasy qabyldanǵan jaǵdaıda bul sandy 13,5 mln-ǵa jetkizý mindeti qoıyldy.
Alaıda, týrıstik sala sarapshylary joǵaryda aıtylǵan sharalardyń memlekettik organdar tarapynan qoldaýǵa ıe bolatynyna tolyq senbeı otyr.
QR MSM vıtse-mınıstri Erlan Qojaǵapanov jınalǵandarǵa memlekettik organdardyń pozıtsııasyn jetkizýge tyrysty.
«Qazaqstanda týrızm salasyna uzaq merzimdi nesıe nemese demeýqarjyǵa birneshe varıant bar. Olardyń biri retinde «Bıznestiń jol kartasyn» aıtýǵa bolady. Osy máseleni QR Ulttyq ekonomıka, Qarjy, Investıtsııalar men damý mınıstrligimen talqylap jatyrmyz. Týrıstik salanyń aýylsharýashylyǵy, ónerkásip, kólik salalarynan mańyzdylyǵy kem emes. Bul sala el bıýdjetine salyq tólep, aqsha ákeletin sala. Avıabıletterdi arzandatý boıynsha QR IDM-men jumys jasap jatyrmyz. Álemde kids go free degen joba bar. Týrıstik maýsymnan tys kezde adamdar 12 jasqa deıingi balalaryn tegin alyp júre alady. Qujatqa osynyń bárin kirgizdik. Avıabıletterdiń baǵasy kerosın qunyna tikeleı baılanysty. Frankfýrtta kerosın baǵasy 600-700 AQSh dollary bolsa, bizde 1 000 AQSh dollary shamasynda. QR Úkimeti osy baǵytta jumys jasap jatyr. Biz qalaı otandyq kerosın óndirisin alǵa qoıamyz, solaı avıabıletter arzandaıdy», - dedi Erlan Qojaǵapanov.
Al elektrondy vızaǵa qatysty suraqty sheshý úshin QR Premer-Mınıstriniń orynbasary Asqar Jumaǵalıev pen QR UQK, ІІM birige jumys jasap jatyr.