Almatyda sybaılas jemqorlyq deregimen 18 laýazymdy tulǵa qylmystyq jaýapkershilikke tartyldy (FOTO)
Bul týraly búgin Ǵylym ordasy ǵımaratynda ótken 2015-2020 jyldarǵa arnalǵan sybaılas jemqorlyqqa qarsy kúres strategııasyn talqylaýǵa arnalǵan jıyn barysynda málim boldy.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamenti basshysynyń orynbasary Baqtııar Qamalovtyń aıtýynsha, «qyzmettik laýazymyn» bóten maqsatta paıdalanǵan qyzmetkerlerdiń 5-i para alyp jatqan jerinen ustalǵan.
Olar memleketke 54 mln 943 myń teńge kóleminde shyǵyn keltirdi. Qazir bul qarjy túgelimen memleket bıýdjetine aýdaryldy. Sondaı-aq, jyl basynan beri sybaılas jemqorlyqqa yqpal etetin jaǵdaı týdyrǵany úshin 15 laýazymdy tulǵa tártiptik jaýapkershilikke tartyldy.
«QR Prezıdenti Nursultan Nazarbaev «Nur Otan» partııasynyń 16 sezinde merıtokratııa qaǵıdattaryn qorǵaý jáne sybaılas jemqorlyqtyń aldyn alý men ony boldyrmaýdy jolǵa qoıý mańyzdy dep aıtqan bolatyn. Sybaılas jemqorlyq eldiń áleýmettik-ekonomıkalyq damýyna, demokratııalyq memlekettiń saıası jáne qoǵamdyq ınstıtýttaryna keri áser etip, eldiń damýyna qaýip tóndiretini anyq. Bul oraıda 2014 jyldyń jeltoqsan aıynda sybaılas jemqorlyqpen kúres strategııasy qabyldanyp, onda jemqorlyqty boldyrmaý, ony týdyratyn jaıttardyń aldyn alý tetikteri kórsetilgen», - dedi Bahtııar Kamalov.
Mamandardyń aıtýynsha, búgingi otyrys barysynda jeń ushynan jalǵasqan jemqorlyqtyń aldyn alýdyń jańa tetikteri usynyldy.
«Búgingi ótip jatqan otyrys jemqorlyqqa qarsy kúrestiń jańa tetikterin qarastyrýǵa baǵyttalǵan. Memleket basshysy jaqynda 5 ınstıtýtsıonaldy reformany iske asyrýdy tapsyrǵan bolatyn. 100 naqty qadam da jarııa etildi. «Nur Otan» partııasy da «Nurly jol» baǵdarlamasynda kórsetilgen maqsatty ındıktatorlarǵa jetý úshin júıeli túrde jumys jasap keledi», - dedi «Nur Otan» partııasynyń Almaty qalalyq bólimshesi tóraǵasynyń orynbasary Stanıslav Kankýrov.