Almatyda suıytylǵan gaz baǵasyn negizsiz kótergen kompanııaǵa is qozǵaldy

ALMATY. QazAqparat - Almaty prokýrorlary suıytylǵan gaz satýmen aınalysatyn monopolıst kompanııaǵa qatysty sotaldy tergep-tekserýdi bastady. Bul týraly vedomstvanyń baspasóz qyzmeti málim etti, dep habarlaıdy QazAqparat tilshisi.

Almaty qalasynyń prokýratýrasy QR Básekelestikti qorǵaý jáne damytý agenttiginiń Almaty qalasy boıynsha departamentiniń mamandarymen birlesip, «Petrosun» JShS qyzmetine tekserý júrgizdi.

«Kompanııanyń ońtústik óńirlerde naryqtaǵy úlesi 76,9 paıyz. Byltyrǵy jyldyń qyrkúıek aıynan jeltoqsanǵa deıin «Petrosun» JShS aımaqtaǵy qyzmetin asyra paıdalanyp, aı saıyn avtogaz baǵasyn barynsha joǵarylatqan. Nátıjesinde osy kezeńdegi ózindik qun bir tonna taýarǵa 323,8 paıyzǵa deıin ósti. Derek boıynsha prokýratýra Qazaqstan Respýblıkasy Qylmystyq kodeksiniń 221-babynyń 2-bóligi («Monopolııalyq qyzmetti teris paıdalaný») boıynsha qylmystyq is qozǵady», - delingen habarlamada.

Vedomstvo málimetinshe, sotaldy tergeý Almaty qalasy boıynsha Ekonomıkalyq tergeý departamentine tapsyryldy.

Qazaqstan Respýblıkasy Qylmystyq-protsestik kodeksiniń 201-babyna sáıkes ózge de málimetter qazirgi ýaqytta jarııa etýge jatpaıdy.