Almatyda Súıinbaı Aronulynyń 200 jyldyǵy atalyp ótti (FOTO)
«Uly Súıinbaıdyń esimi árqashan da halyqtyń júreginde jáne esinde bolady. Uly aqyn óz halqynyń táýelsizdigin armandady jáne qıyn-qystaý kezeńde óz shyǵarmashylyǵymen jigerlendirip otyrdy. Qazir táýelsiz elde halqy onyń esimin qasterleýde, eskertkishter turǵyzyp, shyǵarmalaryn basyp shyǵarýda, onyń esimi mektepter men kóshelerge berilgen. Búgingi shara buǵan taǵy bir dálel», - delingen Prezıdenttiń jedelhaty mátininde.
B.Baıbek Súıinbaı muralary Qazaqstanda ǵana emes, tutastaı Orta Azııaǵa tanymal, aqyn mereıtoıy eldiń barlyq túpkirinde atalyp ótýde ekenin atap ótti.
Eske sala keteıik, Prezıdent Nursultan Nazarbaevtyń tapsyrmasymen bıylǵy qyrkúıek aıynda Jambyl atyndaǵy fılarmonııanyń aldynda Súıinbaı Aronulynyń eskertkishi saltanatpen ashylǵan bolatyn.
Shara M.Áýezov atyndaǵy Qazaq memlekettik akademııalyq drama teatrynda eldiń eńbek sińirgen ártisteri men jetekshi óner ujymdary qatysqan kontsert baǵdarlamasyna jalǵasty.
Súıinbaı Aronuly 1815 jyly Jetisý oblysy Vernyı ýezinde Uzynaǵash bolysynda (qazirgi Almaty oblysy Jambyl aýdany Súıinbaı aýylynda) týǵan. Aqyn esimimen aýyldar, mektep, Almaty oblysyndaǵy fılarmonııa atalǵan, týǵan jerinde kesene salynyp, onyń aldyna músni ornatyldy jáne Súıinbaı mýzeıi ashyldy, Taldyqorǵanda aqynnyń qola eskertkishi turǵyzyldy. Almatyda qaladan áýejaıǵa shyǵatyn úlken dańǵylǵa onyń esimi berilgen, Jambyl atyndaǵy fılarmonııa aldynda eskertkishi ornatylǵan.