Almatyda súrilgen úılerdiń ornyna qaı aýdandarda baspana salynyp jatyr
Almaty qalasy ákimdiginiń málimetine súıensek, 2021 jyly Jetisý aýdanynda ınvestormen birge Skrıabına kóshesindegi 52 páterlik 6 úı súrildi. Olardyń ornyna 2022 jyldyń ekinshi toqsanynda 304 páterlik 4 jańa úı salyndy (1-inshi jáne 2-kezeń).
Úshinshi kezeńniń qurylysy aıasynda Raıymbek dańǵylynda ornalasqan № 265, № 265a úıi buzyldy. Sonymen qatar Krylov kóshesindegi 24 páterlik úsh apatty úı súrilip, onyń ornynda 184 páterlik 2 úıdiń qurylysy bastaldy.
Áýezov aýdanynda Súleımenov kóshesiniń boıyndaǵy birinshi kezeńniń qurylysy aıasynda 5 apatty úı (40 páter) buzylyp, onyń ornynda 209 páterlik 4 úıdiń qurylysy bastaldy.
Sondaı- aq Súleımenov kóshesiniń batysy, Jandosov kóshesiniń ońtústigindegi aımaqqa qosymsha ınvestor tartyldy. Jeke qurylys salýshy II, V, VI, VII, VIII kezeńderge úı salý quqyǵyn aldy. Osylaısha, jobany aıaqtaý merzimi bes jylǵa – 2033 jyldan 2028 jylǵa deıin qysqardy.
Túrksib aýdanyndaǵy Moldaǵalıev-Saýranbaev-Chernyshevskıı-Tolstoı kósheleriniń sharshysynda 152 páterlik kóppáterli 7 turǵyn úıdiń qurylysy júrip jatyr.
Aıta keteıik, Almaty qalasynyń turǵyn úı qoryn jańǵyrtýdyń 2021-2025 jyldarǵa arnalǵan baǵdarlamasy jeke ınvestıtsııa esebinen júzege asyrylýda.
Búgingi kúni «Almaty» Áleýmettik-kásipkerlik korporatsııasy» ulttyq kompanııasy» AQ qala ákimdigin, «Baıterek» ulttyq basqarýshy holdıngi» AQ, QR Indýstrııa jáne ınfraqurylymdyq damý mınıstrligin, sondaı-aq Ulttyq ekonomıka mınıstrligin qosa alǵanda, ýákiletti organdarmen birlesip qarjylandyrý máselesin pysyqtap jatyr.
«Qosymsha qarjylandyrý qurylys jumystarynyń qarqynyn arttyrady. Bólingen qarajat tozyǵy jetken úılerdi súrýge, ınvestorlardy yntalandyrýǵa, sondaı-aq apatty jaǵdaıdaǵy úı ıelerin turǵyn úı qory retinde paıdalanýǵa arnalǵan páterlerge qonystandyrýǵa jumsalady», - dep atap ótti ákimdikten.
Buǵan deıin Almaty ákimi Erbolat Dosaev megapolıstegi apatty jaǵdaıdaǵy úılerdi buzýdyń jańa baǵdarlamasy ázirlenip jatqanyn aıtqan bolatyn.
Sondaı- aq 2022 jyly Almatyda 278 páterlik 32 apatty úı buzylatyny týraly jazǵan bolatynbyz.