Almatyda sý óshiriledi dep jalǵan aqparat taratqan 54 jastaǵy áıel ustaldy

ALMATY. QazAqparat - Almatyda áleýmettik jeli arqyly jalǵan aqparat taratqany úshin 54 jastaǵy jergilikti turǵyn ustaldy. Ol kinásin moıyndap, jasaǵan isine ókinetinin aıtty, dep habarlaıdy QazAqparat tilshisi.

Jalǵan habarlamanyń mazmuny mynadaı: «Qalalyq sýmen jabdyqtaý qyzmeti sýdy óshiredi, sondyqtan aýyz sýdy kóbirek alyp qoıyńyzdar».

Óz kezeginde 54 jastaǵy áıel óz kinásin moıyndady.

«H. esimdi azamatshanyń sózine qaraǵanda, ol halyq arasynda úreı týǵyzǵysy kelmegen, tek dostaryna eskertý jasamaq bolǵan. Qandaı bolsa da, onyń telefony arqyly aqparat tarady, endi ol óziniń áreketi úshin QR QK 274-baby 4-tarmaǵy boıynsha jaýap berýge májbúr bolady. Jedel habar almasý arqyly jiberiletin aqparattyq málimetterdiń barlyǵy derlik jalǵan. Qoldanbaly qosymshalaryńyz bolǵandyqtan, bul sizde smartfon bar, demek, siz resmı BAQ-taǵy jańalyqtardy kóre alasyz degendi bildiredi. Ádette mundaı habarlamalar is-sharanyń naqty ýaqytyn, bolatyn kúni men jerin kórsetpeıdi. Sodan keıin mundaı habarlamalar kórshi elderden de keletin jaǵdaılar bolady. Azamattar qandaı da bir aqparattyq habarlama jibermes buryn, onyń durys-burystyǵyn tekserip alýy kerek. Eldegi tótenshe jaǵdaı kezinde bile tura jalǵan aqparat taratqany úshin jeti jylǵa deıin qamaý túrindegi jaza qoldanylady. Ásirese bul habarlama halyq arasynda dúrbeleń týǵyzý maqsatynda jiberilse», – deıdi Almaty qalalyq PD krımınaldyq polıtsııa basqarmasynyń bastyǵy Janbolat Zıadın.

Buǵan deıin «Almaty sý» MKK 4 kún sý berilmeıdi degen aqparatty joqqa shyǵarǵan bolatyn.