Almatyda sý basý qaýpi bar aımaqtar kommýnaldyq qyzmetterdiń baqylaýynda
Qalalyq ákimdiktiń málimetinshe, kommýnaldyq qyzmettteriniń jáne aýdandyq Tótenshe jaǵdaılar basqarmalarynyń kúshteri men quraldary qaýipti aımaqtarǵa aldyn ala jiberildi. Jaýyn-shashynǵa deıin ınertti materıaldar daıyn boldy.
Búgin 16 tamyz kúni sý basyp qalǵan 10 oqıǵa tirkeldi, onyń 5-i qalpyna keltirildi. Qalǵan 5 mekenjaıda sýdy sorý jáne aryqtardy tazartý jumystary jalǵasyp jatyr.
Medeý aýdanyna qarasty Esenberlın kóshesindegi № 221 úıdiń janynda sý jınalyp qaldy. Munda kommýnaldyq uıymdardyń qyzmetkerleri aryq jelisin tazartyp jatyr.
Sonymen qatar, Ó. Jánibekov kóshesindegi 76-úıdiń aýlasyna da sý jınalyp qalǵan. Bul jerde kommýnaldyq uıymdardyń qyzmetkerleri jumys isteýde.
Almaly aýdanynyń Abaı dańǵyly boıyndaǵy Naýryzbaı batyr kóshesiniń qıylysynda, Muqanov kóshesindegi 172-úıdiń janynda; Brýno kóshesindegi 1-úıdiń janynda jınalǵan sý sorǵyzylyp, aryq jelisi tazartylyp jatyr.
Rozybakıev kóshesi 5 «a», Qarasaı batyr kóshesi 315; Brýsılovskıı kóshesi 100a-úıindegi aýlada sý jınalǵan. Bul jerlerge de kommýnaldyq uıymdardyń kúshteri jiberildi.
Alataý aýdanynda kommýnaldyq qyzmetter «Qarasý» shaǵynaýdanyndaǵy Aralqum kóshesindegi 22-úıge bardy.
Jetisý aýdanynda Raıymbek dańǵylyndaǵy «Nurym» meıramhanasynyń aýmaǵynda ınjenerlik kommýnıkatsııalar jumys istep jatyr.
Sý basyp qalýdyń basty sebebi – aryq jelisin turmystyq qaldyq bitep tastaǵan.
Eske salsaq, buǵan deıin TJD 2021 jylǵy 14 tamyzdaǵy №28 eskertýi boıynsha keı jerlerde jaýyn-shashynnyń, betkeılerde kóshkinniń bolýy múmkin ekenin, ózenderde sý deńgeıiniń kóterilgenin habarlaǵan bolatyn.