Almatyda "Stýdenttik kóktem - 2010" festıvaliniń jeńimpazdary marapattaldy
dep habarlaıdy QazAqparat.
Atalmysh shara - oqý ornynyń eń kólemdi shyǵarmashylyq jobasy. Oǵan Ýnıversıtettiń barlyq fakýltetteri men kolledj stýdentteri qatysty. Bıylǵy festıval Uly Otan soǵysyndaǵy Jeńistiń 65 jyldyǵyna arnaldy. Kórkem ónerpazdardyń ónerin saralap qaraý aǵymdaǵy jyldyń aqpan aıynda jeke shyǵarmashylyq baıqaý retinde bastalǵan bolatyn. Sonyń nátıjesinde 28 atalymnyń jeńimpazy anyqtaldy. Onyń ishinde «Eń úzdik júrgizýshi», «Eń úzdik ádebı-mýzykalyq komedııa», «Búgingi zamanǵy bı», «Eń úzdik patrıottyq án», «Vokaldy-aspaptyq ansambl» jáne taǵy da basqa atalymdar bar. Atalymdar boıynsha jeńimpazdardyń barlyǵyna estelik dıplomdar tabystaldy.
Festıvaldiń bas júldesi men 100 myń teńge kólemindegi aqshalaı syılyqty jáne QazUÝ rektorynyń Qurmet gramotasyn oqý ornynyń kolledj stýdentteri jeńip aldy. Ekinshi oryndy jáne aqshalaı syılyqty ekonomıka jáne bıznes fakýlteti men bıologııa fakýlteti alsa, úshinshi oryndy jáne aqshalaı syılyqty geografııa fakýltetiniń stýdentteri enshiledi.
"Bıylǵy festıval Uly Otan soǵysyndaǵy Jeńistiń 65 jyldyǵyna arnalǵanymen de erekshe bolyp otyr. Stýdentter áskerı qoıylymdardy kórsete otyryp, elimizdiń tarıhyn, atalarymyz ben ákelerimizdiń erligin jaqsy biletindikterin dáleldedi. Bizdiń kolledjdiń oqýshylary áli tolyqqandy stýdent bolmasa da, ózderiniń shyǵarmashylyq qabiletterin joǵarǵy deńgeıde kórsete bildi. Bizdiń qajyrly eńbegimiz ben yntymaǵymyz jáne festıvaldiń jaqsy uıymdastyrylýy bizdi jeńiske ákeldi", dedi QazUÝ-niń kolledj dırektory Beıbitgúl Kárimova.
"Stýdenttik kóktem - 2010" festıvali jeńimpazdardyń gala-kontsertimen aıaqtaldy.