Almatyda stýdentterge arnalǵan daǵdarys ortalyǵy iske qosyldy

ALMATY. QazAqparat – Jańa oqý jyly qarsańynda stýdentterge arnalǵan daǵdarys ortalyǵy iske qosyldy. Mundaı oryndar elimiz boıynsha Astana, Almaty jáne men Shymkent qalalarynan ashyldy, dep habarlaıdy QazAqparat tilshisi.

Ǵylym jáne joǵary bilim mınıstrligi ókilderiniń aıtýynsha, bıyl úsh megopolıste alǵash ret daǵdarys ortalyǵy jumysyn bastady. Astana men Almatyda 30-dan, al Shymkentte 20 orynǵa laıyqtalǵan. Bul jerde stýdent jataqhanaǵa ornalasqansha 1-2 kún túnep shyǵa alady. Eshkim dalada qalmaıdy.

«Oǵan qosa árbir joǵary oqý ornynyń janynan ahýal ortalyǵy da quryldy. Munyń barlyǵy úlken qalalarǵa bilim izdep kelgen stýdentterdi jataqhanamen qamtamasyz etý úshin jasalyp jatyr», - dep jazdy Ǵylym jáne joǵary bilim mınıstrliginiń Telegram kanaly.

Stýdentter jataqhanaǵa ótinishti onlaın túrde jiberedi. Jaýaby 1 kún ishinde beriledi. Al jataqhana jetpegen jaǵdaıda hostelge ornalastyrady. Almaty qalasy boıynsha qyrkúıekke deıin jańasy bar, qaıta jasalǵany bar 5 jataqhana qoldanysqa beriledi. Bul degenińiz 1 600-ge jýyq oryn. Oǵan qosymsha jyl sońyna deıin dál osyndaı 14 nysannyń qurylysy aıaqtalyp, 4 myńǵa tarta stýdent jataqhanaǵa ornalasady.

Eske sala keteıik, jataqhanada turatyn ata-anasynyń qamqorlyǵynsyz qalǵan jastar men múgedektigi bar stýdentterge ótemaqy tólenedi. Onyń kólemi – jylyna 29 aılyq eseptik kórsetkish.