Almatyda sportshylar men qarttar Medeý baspaldaqtarynda jarysty

ASTANA. QazAqparat - Almatynyń Medeý shatqalynda «Sporttyq Almaty» baǵdarlamasynyń aıasynda XXIH-shy «Medeý baspaldaq-2017» júgirý jarysy ótti, dep habarlaıdy QazAqparat.

Almaty sport habynyń málimetinshe, 500-den asa adam 100, 200, 300, 400, 500 jáne 841 baspaldaqpen júgirdi.

«Rýhanı jańǵyrý» aıasynda ótken jarysqa 7 jastan  bastap barlyq  áýesqoılar, tanymal jáne kásipqoı sportshylar, sonymen qatar, otbasylyq komandalar qatysty. Nátıjesinde, 841 baspaldaqqa erler arasynda eń jaqsy kórsetkishke - 4 mınýt 20 sekýndqa ıe bolǵan 19 jasar Ánýar Erǵazy bolsa, qyzdar arasynda A.Janbatyr 841 satyny 9 mınýt 55 sekýndta baǵyndyrdy.

Tanymal sportshylardyń qatarynda álemdik rekordtarymen Gınnes kitabyna eńgen akrobatshy Vladımır Gashýta boldy. 70 jastan joǵary jas aralyǵyndaǵy qatysýshylardy ozyp 100 satyny birinshi bolyp baǵyndyrǵan ol óziniń qyryqynshy altyn medaline ıe boldy.

«Men bul jarysqa jylda qatysamyn. 25 jyl buryn 200 satyny 37-i sekýndta baǵyndyrǵan edim, sodan beri eshkim bul kórsetkishti jańartpady. Qazir ózim úshin sportpen aınalysamyn. 100, 200, 300 satyǵa qatysyp turamyn. Bul bizdeı jastaǵy kisilerge óte paıdaly is-shara, sebebi óz jasyndaǵy azamattarmen jarysyp, keremet atmosferaǵa bólenesiń», - dedi Vladımır Gashýta.

Sonymen qatar, ol 200 baspaldaqqa ekinshi bolyp shyǵyp kúmis júldeni qanjyǵasyna baılady. Al, áıelder arasynda 70 jastan joǵary qatysýshylardyń qatarynda 100 satyǵa birinshi bolyp Áýezov aýdanynyń ardagerleri qataryndaǵy Valentına Vıchkýtkına keldi.

Jeńimpazdar men júldegerler úzdik nátıjeler boıynsha, barlyq jas erekshelikterine  baılanysty anyqtalyp medal men dıplomdar jáne jarys uıymdastyrýshy men seriktesteri  - medıtsınalyq kompanııa «Omron» jáne «Sport Idea» sport dúkeni atynan syılyqtar tabystaldy.

Osy merekelik sharanyń qatysýshylary men qonaqtary «Galantýs» grýppasynyń jandy daýysta oryndalǵan ánderine bı bılep, arnaıy oryndarda kóptegen oıyndar uıymdastyryldy.

Aıta ketý kerek, bul sporttyq jarysqa eń jas jáne eresek sportshylar (7-12 jas aralyǵyndaǵy balalar jáne 70-ten asqandar) baspaldaqty baǵyndyrýǵa  múmkindik alǵan bolatyn.

Atalmysh sporttyq shara buqaralyq sporttyń damýyna baǵyttalǵan  «Sporttyq Almaty» baǵdarlamasynyń aıasynda ótkizildi.