Almatyda sottalǵan adam kollektorlyq kompanııaǵa jumysqa ornalasty
02:11, 07 Mamyr 2022
NUR-SULTAN. QazAqparat - Almatyda probatsııa baqylaýyndaǵy sottalǵan kollektorlyq kompanııaǵa jumysqa ornalasty, – dep habarlaıdy QazAqparat Polisia.kz saıtyna silteme jasap.
Almaty qalasy boıynsha Qylmystyq atqarý departamentine qarasty Almaly aýdandyq probatsııa qyzmetiniń mamandary jýyrda sottalǵan azamatty kollektorlyq kompanııaǵa jumysqa ornalastyrdy.
Jumyssyz júrgen sottalǵandar qaıtadan teris jolǵa túsýi múmkin. Osyny eskergen probatsııa mamandary sottalǵan M.-niń qujattaryn Almaty qalasy Jumyspen qamtý ortalyǵyna jibergen. Jýyrda ortalyq mamandary atalǵan azamatty kollektorlyq kompanııaǵa operatorlyq jumysqa ornalastyrdy.
«Almaly aýdandyq probatsııa qyzmetinde 212 sottalǵan esepte turady. Solardyń ishinen jyl basynan beri 23 jazasyn óteýshi eńbekpen qamtamasyz etilý úshin jumyspen qamtý ortalyǵyna jiberildi»,-delingen habarlamada.