Almatyda sotqa deıin daýlardy retteý ınstıtýttaryna ne jetispeıtini aıtyldy
Sharaǵa «Ádilet» joǵary quqyq mektebiniń dekany, elimizdiń Joǵary soty janyndaǵy Ǵylymı-aqyldastyq keńesiniń múshesi, zań ǵylymdarynyń doktory, professor Svetlana Moroz, Qazaqstan Ulttyq tutynýshylar odaǵynyń basqarma basshysy, Qazaqstan Medıatorlar odaǵynyń prezıdenti, assotsııalanǵan professor Svetlana Romanovskaıa, advokattar, ǵalymdar men doktoranttar qatysty.
Kezdesý depýtat bastamashy bolǵan «Qazaqstan Respýblıkasynyń keıbir zańnamalyq aktilerine sottan tys jáne sotqa deıingi daýlardy retteý ınstıtýttaryn damytý máseleleri boıynsha ózgerister men tolyqtyrýlar engizý týraly» zań jobasy aıasynda ótti. Onda zań jobasyna engiziletin ózgerister qaraldy.
Júzdesýge qatysýshylar Qazaqstandaǵy medıatsııa ınstıtýtyn odan ári damytýdyń keleshegin, sottan tys jáne sotqa deıin daýlardy retteý ınstıtýttaryn memlekettik retteý tetikterin, sondaı-aq medıatsııaǵa qatysty ózekti máselelerdi qyzý talqylady.
Kezdesý qorytyndysy boıynsha jınaqtalǵan usynystar ýákiletti memlekettik organdardyń, ǵalymdar men sarapshylardyń qatysýymen ótetin jumys tobynyń otyrystarynda qarastyrylyp, zertteletin bolady.
Sondaı-aq Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Álı Bektaev Túrkistan oblysynyń Keles aýdanynda jumys babyndaǵy saparmen bolyp, oblystyq jáne aýdandyq máslıhat depýtattarymen, medıtsına, aýyl sharýashylyǵy jáne sý sharýashylyǵy qyzmetkerlerimen, áleýmettik-mádenı sala, shaǵyn jáne orta bıznes ókilderimen kezdesý ótkizdi.
Depýtat Parlament qabyldaǵan zańdardyń negizgi erejeleri týraly habardar etti.
Kezdesýde Memleket basshysynyń Qazaqstan halqyna Joldaýynyń negizgi basymdyqtaryn iske asyrý máseleleri talqylandy, sondaı-aq elimizde júzege asyp jatqan reformalar egjeı-tegjeıli túsindirildi.
Qatysýshylar ózderin tolǵandyrǵan máselelermen bólisip, óńirdiń áleýmettik-ekonomıkalyq damýy, bilim berý, az qamtylǵan otbasylardy qamtamasyz etý máselelerin kóterdi.
Álı Bektaev barlyq ózekti máseleler boıynsha tıisti organdarǵa depýtattyq saýal joldanatynyn jáne jeke baqylaýǵa alynatynyn atap ótti.
Al Senat tóraǵasynyń orynbasary Bektas Beknazarov Shymkent qalasyndaǵy jumys sapary aıasynda qalalyq máslıhat depýtattarymen jáne jergilikti zııaly qaýym ókilderimen kezdesti.
Jıynǵa senatorlar Aıgúl Qapbarova, Nurlan Beknazarov, Shymkent qalalyq máslıhatynyń hatshysy Ǵanı Tashqaraev jáne qalalyq qoǵamdyq keńestiń tóraǵasy Nurǵazy Buharbaı qatysty.
Depýtattar kezdesýde Parlamentte qabyldanǵan zańdardyń mazmunyna toqtala kelip, «Pedagog mártebesi týraly» zańnyń jáne ataýly áleýmettik kómektiń erekshelikterin talqylady.
Alqaly jıynda sóz alǵan Bektas Beknazarov Parlament qabyldanǵan zańdardy halyqqa keńinen túsindirý maqsatynda osy jyldyń 5 qańtarynan bastap óńirlerdi aralap, turǵyndarmen kóptegen kezdesýler bolǵanyn atap ótti. Senatordyń aıtýynsha, kezdesýlerdiń basty maqsaty – halyqtyń ózekti máselelerin sheshý úshin azamattardyń ózinen usynystar jınaý bolyp otyr.
Senat depýtattary kezdesýde qozǵalǵan ózekti máseleler men tıimdi usynystar palata otyrystarynda sarapqa salynatynyn, qajetti jaǵdaıda Úkimetke joldap, olardyń oń sheshim tabýyna yqpal etetinderin jetkizdi.
Memleket basshysynyń bastamasymen júzege asyp otyrǵan baǵdarlamalardyń oryndalýy jóninde habardar bolǵan depýtattar aldaǵy ýaqytta da Shymkent qalasynyń ósip-órkendeýi jolyndaǵy jobalarǵa óz úlesterin qosyp, qoldaý bildiretinderin aıtty.