Almatyda soǵys ardagerlerine 1,5 mln teńgeden berý josparda

ALMATY. QazAqparat- Almaty qalasynda Ekinshi dúnıejúzilik soǵysqa qatysqan 58 ardager qaldy. Olardyń árqaısysyna Jeńis kúnine oraı 1,5 mıllıon teńgeden berý josparda. Bul týraly Almaty ákimi Erbolat Dosaev Alataý aýdany turǵyndarymen kezdesýde málimdedi, dep habarlaıdy QazAqparat tilshisi.

Kezdesý barysynda megapolıs turǵyny qala ákiminen bıyl soǵys ardagerlerine materıaldyq kómek kórsetile me, dep surady.

«9 mamyr - bárimiz úshin qasıetti mereke. Iıa, ókinishke oraı, ardagerler qatary jyl saıyn azaıyp keledi. Sońǵy málimetter boıynsha, Almatyda 58 ardager turady. Men olardyń barlyǵy óz merekelerin aman-esen qarsy alǵanyn qalaımyn jáne biz olardy jyl saıyn quttyqtap kelemiz. Kómek týraly - qarajat qarastyrylǵan, biz árbir ardagerge bir mıllıon teńgeden tóleýdi josparladyq. Erteń máslıhat otyrysy ótedi, men depýtattardan olarǵa 1,5 mln teńgeden berý úshin taǵy bes júz myń qosýdy suradym», – dedi Almaty qalasynyń ákimi Erbolat Dosaev.

Aıtýynsha, 9 mamyr kúni qalada dástúr boıynsha 28 gvardııashy-panfılovshylar atyndaǵy saıabaqta gúl shoǵy qoıylyp, merekelik kontsert bolady.

«Bizdiń ardagerlerge qalanyń barlyq aýdanynda qurmet kórsetiledi. Biz bul merekege erekshe daıyndalyp, úlken nazar aýdaramyz. Merekege ózi qatysa almaıtyn ardagerlerge jeke kóńil bólemiz – aýdan ákimderimen birge men ózim olardyń árqaısysyna baryp, Jeńis kúnimen jeke quttyqtaıtyn bolamyn»-dedi ákim.

Sondaı-aq ol Aýǵan jaýyngerleri men tyl eńbekkerlerine de materıaldyq kómek kórsetiletinin atap ótti.