Almatyda soǵys ardageri Nıkolaı Taratýnın 100 jasqa toldy

ALMATY. QazAqparat – Búgin Ekinshi dúnıejúzilik soǵys ardageri – shekarashy, «Qyzyl juldyz» ordeniniń eki dúrkin kavaleri, birinshi dárejeli «Uly Otan soǵysy», «Qurmet» ordenderiniń ıegeri, otstavkadaǵy polkovnık Taratýnın Nıkolaı Aleksandrovıch 100 jasqa toldy, dep habarlaıdy QazAqparat tilshisi.

Nıkolaı Taratýnın 1941 jyly qurdastarymen birge Otandy qorǵaý úshin maıdanǵa attanady. Batys, Stalıngrad, Ýkraına maıdandarynda jankeshtilikpen shaıqasyp, jerimizdi basqynshylardan qorǵady.
Soǵystan soń Almatydaǵy jaıaý áskerler ýchılışesiniń kýrsanty atandy. Oqýdy jaqsy aıaqtap, Túrkııamen, Iranmen, Qytaımen, Japonııamen shekaralas aımaqtarda áskerı qyzmetin ótedi. Búginde soǵys ardageri Nıkolaı Aleksandrovıch ulymen birge turady, úsh nemeresi, tórt shóberesi bar. 9 mamyrda bári jınalyp, ardager atalaryn Jeńis kúnimen quttyqtaıdy.
Maıdangerdi Almaty ákimdiginiń, «Zastava Tarlandary» ardager shekarashylardyń respýblıkalyq qoǵamdyq uıymynyń, qalalyq Ardagerler keńesiniń, AMANAT partııasynyń ókilderi, qorǵanys jónindegi basqarmanyń áskerı qyzmetshileri, Jas sarbaz áskerı-patrıotttyq klýbynyń jasóspirimderi, QR Qorǵanys Kúshteri áskerı-patrıottyq ortalyǵy fılıalynyń ókilderi, UOS -nyń soǵysy men tyl eńbekkkerleri Ardagerler Keńesiniń qoǵamdyq qory, UQK shekara qyzmetiniń áskerıleri quttyqtady.

Ákimdik jáne kásipkerler áskerı shekaralyq garnızonmen, tehnıkany jóndeý jónindegi basqarmanyń jáne QR UQK shekara qyzmetiniń áskerılerimen birge ardagerdiń úıin jóndep, aýla aınalasyn tazartyp berdi.
Aıta keterligi, memleket, bıznes ókilderi, ÚEU, áskerı bólimsheler ardagerlerge tek Jeńis kúni ǵana emes, únemi qoldaý kórsetip, kómektesip keledi. Aqshalaı tólemder, túrli jeńildikter jasalyp, onyń ishinde medıtsınalyq kómek te kórsetiledi.
Búgingi kúni Almaty qalasynda Ekinshi dúnıejúzilik soǵysqa qatysqan 58 ardager qaldy. Olardyń árqaısysyna Jeńis kúnine oraı 1,5 mıllıon teńgeden berý josparda.