Almatyda sıntetıkalyq esirtkige táýeldi jasóspirimder sany artty - narkolog

ALMATY. QazAqparat- Almatyda jyl basynan beri sıntetıkalyq esirtkige táýeldiligi bar 17 jasóspirim esepke alyndy. Mundaı derekti óńirlik kommýnıkatsııalar qyzmetiniń brıfınginde psıhıkalyq densaýlyq ortalyǵy dırektorynyń narkologııalyq qyzmet jónindegi orynbasary, joǵary bilikti sanatty psıhıatr-narkolog dáriger Gúlmıra Ábdibaeva keltirdi, dep habarlaıdy QazAqparat tilshisi.

Dárigerdiń aıtýynsha, mamandar sıntetıkalyq esirtkiniń qanshalyqty qaýipti ekenin aıtyp, dabyl qaqsada, oǵan táýeldilerdiń sany azaıar emes. Ásirese,18 jasqa deıingi jasóspirimder arasynda sıntetıkalyq esirtkige áýestengender kóbeıgen.

«Esepke qoıylǵan jasóspirimder sany artty. Eger 2021 jyly esepte 8 kámeletke tolmaǵan bolsa, 2022 jyly - 18, al 2023 jyldyń birinshi toqsanynda - 17 jasóspirim esepke alyndy», - dedi ol.

Psıhıkalyq densaýlyq ortalyǵy dırektorynyń narkologııalyq qyzmet jónindegi orynbasary, psıhıatr-narkolog dáriger Gúlmıra Ábdibaeva balalar men jasóspirimderdiń ata-analaryn olarmen senimdi qarym-qatynasty saqtaýǵa shaqyrdy.

«Eger bala esirtki týraly surasa, qoryqpańyz, ony ne úshin qyzyqtyratynyn, ne kórgenin nemese sezingenin bilýge, túsinýge tyrysyńyz. Jazalaýdyń qajeti joq. Kez kelgen bala úshin ata-anasynyń qoldaýy, kómektesýi óte mańyzdy», - dedi dáriger.

Sarapshynyń aıtýynsha, búginde eń kóp taralǵan sıntetıkalyq preparattar-amfetamın (JITS dep tanylǵan, amf, jyldamdyq, fen, tez), metamfetamın jáne ekstazı (MDMA). Osy túrdegi preparattardyń hımııalyq quramy dopamınniń bólinýin jasandy túrde yntalandyrady, nátıjesinde kóńil-kúı biraz ýaqytqa kóteriledi, stress jáne barlyq problemalar men ýaıymdar ýaqytsha joıylady.

«Esirtki qoldanýshylar kóp jaǵdaıda máseleniń bar ekenin joqqa shyǵaryp, kez-kelgen ýaqytta kelesi dozadan bas tarta alamyn dep senip, kómek suraýǵa tyryspaıdy»,- deıdi maman.