Almatyda sıntetıkalyq esirtki óndiretin 5 zerthana joıyldy
Búgingi kúni sıntetıkalyq esirtkiler men olardy shyǵarýǵa arnalǵan zerthanalar ǵalamdyq máselelerdiń biri. Jyl basynan beri qabyldanǵan sharalardyń nátıjesinde Almaty polıtsııasy sıntetıkalyq esirtki shyǵaratyn bes zerthanany joıdy.
«Esirtki zerthanalary kýrerlik qyzmet túrin keńinen qoldanady. Sıntetıkalyq esirtkiler, sondaı-aq, zerthanaǵa arnalǵan túrli reaktıvter men komponentter bizdiń memleketimizdiń aýmaǵyna ár túrli elderden kólik-logıstıkalyq kompanııalarmen keledi, olardyń ishinde 1 500-den astam uıym tek qalada tirkelgen. Bıyl biz sıntetıkalyq esirtkini Reseı Federatsııasynan kýrerlik qyzmetter arqyly tasymaldaýdyń toǵyz jaǵdaıyn anyqtadyq. Osylaısha, Almaty mańynda eki jas jigit esirtki zerthanasyn uıymdastyrdy jáne RF logıstıkalyq kompanııasy arqyly sıntetıkalyq esirtki óndirisiniń túrli komponentterin aldy. Tintý kezinde shamamen 80 keli ártúrli qyshqyldar, sonymen qatar, jalpy salmaǵy 25keli satýǵa daıyn «Jyldamdyq» zaty tárkilendi. Bul ónimniń baǵasy 350 mln teńgeni quraıtyn edi, – dedi Almaty qalalyq PD Esirtki qylmystarymen kúres basqarmasynyń bastyǵy Erlan Almaǵambetov.
Sonymen qatar, spıker esirtki bıznesimen baılanysty qylmystardyń jańa formattarǵa ıe bolǵandyǵyn tilge tıek etti.
«Sıntetıkalyq esirtkini baılanyssyz ádis, ınternet arqyly elektrondy tólemdermen taratý tendentsııasy baıqalady. Qylmystyń bul túrin, ádette, bir adam emes bir top jasaıdy, ár qatysýshynyń rólderi aıqyn. Jyl basynan beri qalada uıymdasqan qylmystyq topty qurý men uıymdastyrýdyń eki faktisi anyqtaldy, «kıvı-ámııandardy» qoldanyp, «gashısh» esirtkisin baılanyssyz satýmen jáne taratýmen aınalysqan jeti adam qamaýǵa alyndy. Qazirgi ýaqytta kúdiktilerge qatysty sot protsesi júrip jatyr. Sonymen qatar, osy jyldyń 11 aıynda esirtkini taratatyn jáne jarnamalaıtyn 207 ınternet-saıt anyqtalǵanyn aıta ketken jón. Olar buǵattaldy», – dep túıindedi Almaǵambetov.