Almatyda shoý uıymdastyrýshylar óz kiristerin 15 esege azaıtyp kórsetken

ALMATY. QazAqparat - Almaty qalasy boıynsha Memlekettik kirister departamenti oıyn-saýyq sharalaryn uıymdastyrýshylarǵa qatysty salyqtyq tekserýler júrgizdi, dep habarlaıdy QazAqparat tilshisi.

Departamenttiń habarlaýynsha, sharany uıymdastyrýshylarǵa qatysty hronometrlik tekserý júrgizildi.

«Atap aıtqanda, kontsert uıymdastyrýshy boıynsha festıvaldi uıymdastyrýdan túsetin kiris 20,9 mln teńgeni qurady, jeke kontsert uıymdastyrý («Halyq arena») - kirisi 31,1 mln teńgege jetken. Eki is-sharanyń qorytyndysy boıynsha uıymdastyrýshynyń kirisi - 52 mln teńge. Al júrgizilgen hronometrlik tekserýge sáıkes salyq tóleýshiler salyq eseptiligi túrinde 3 mln teńgege jýyq somany kórsetti, ıaǵnı shyn mánindegi bolǵan kiris salyqtyq eseptilikte 15 esege nemese 48 mln teńgege tómendetilip kórsetilgen», - dep habarlady Memlekettik kirister departamenti.

Sondaı-aq, «Almaty arenada» jattyǵýdy uıymdastyrýshylarǵa qatysty hronometrlik tekserý júrgizildi. Tekserý barysynda uıymdastyrýshynyń 85 mıllıon teńgeden astam somany quraıtyn kirisi anyqtaldy. Al 2018 jyldyń ishinde salyq tóleýshiniń salyq eseptiliginde aınalym nólge teń bolǵan.

Sonymen qatar, departament 2019 jyldyń sońyna deıin mádenıet, shoý-bıznes jáne basqa da demalys pen oıyn-saýyqtyń salasyndaǵy uıymdastyrýshylarǵa tekserý jumystaryn jalǵastyratyndyǵyn habarlaıdy.