Almatyda shetel azamattarynan 800 dollar alǵan taksıst jazalandy

ALMATY. QazAqparat – Almatyda shetel azamattaryn áýejaıdan qonaq úıge deıin 800 dollarǵa jetkizgen taksı júrgizýshisi jazalandy, dep habarlaıdy QazAqparat tilshisi.

Bostandyq aýdandyq polıtsııa basqarmasyna úndi azamattary aryzdandy.

Belgili bolǵanyndaı, 21 mamyr kúni Almaty halyqaralyq áýejaıy mańynda jeke taksı qyzmetin usynatyn er adam óz kóligine Úndi elinen kelgen týrısterdi otyrǵyzyp, qonaq úıge deıin 1 myń teńgege aparyp tastaýǵa ýáde bergen.

Alaıda, mejeli jerge jetkende ol týrısterden 1 180 dollar suraǵan. Keri jaǵdaıda sómkelerin bermeıtinin aıtyp, qoqan-loqy kórsetken. Sóıtip sheteldikter júrgizýshige 800 dollar berýge májbúr bolǵan.

Polıtseıler 27 jastaǵy jigitti ustady. Oǵan qatysty QR Qylmystyq kodeksiniń 194-baby (Bopsalaý) boıynsha qylmystyq is tirkeldi.

«Óz kinásin tolyq moıyndaǵan ol shetel azamattaryna keltirilgen shyǵyndy ótep berdi. Taksı júrgizýshisiniń kóligi jol júrý erejelerin buzǵany úshin jáne tólenbegen aıyppulyna baılanysty arnaıy turaqqa qoıyldy», - dep habarlady vedomstvodan.

Buǵan deıin shetel azamatyn áýejaıdan Markov kóshesine deıin 400 eýroǵa jetkizgen taksı júrgizýshisi jazalanǵan bolatyn.