Almatyda shekarashy qyz-kelinshekterge syılyq berildi

ALMATY. QazAqparat - QR Ulttyq qaýipsizdik komıteti shekara qyzmetiniń akademııasy búgin qataryndaǵy áskerı qyz-kelinshekterdi 8 naýryz - Halyqaralyq áıelder kúni merekesimen quttyqtady, dep habarlady QazAqparat tilshisi.

Búgin shekarashylardyń negizgi bilim ordasy sanalatyn UQK shekara qyzmetiniń akademııasy qatarynda qyzmet etetin qyz-kelinshekterge arnap merekelik kontsert qoıdy. Búgingi tańda akademııa qabyrǵasynda  250 qyz-kelinshek qyzmet etýde.

Merekelik keshte sóz bastaǵan akademııa basshysy polkovnık Pavel Polıvanov otbasy ómiri men áskerı qyzmetti qatar alyp júrgen áriptesterine alǵys aıtty.

«8 naýryz kúni qyz-kelinshekter hanshaıymǵa aınalady. Sizder áskerı qyzmetpen birge otbasy ómirin de qatar alyp, erlik tanytyp júrgen jansyzdar. Sizderdi merekelerińizben shyn júrekten quttyqtaımyn», - dedi polkovnık Pavel Polıvanov.

Atalǵan akademııada abyroıly qyzmet etip júrgen qyz-kelinshekter kóp. Solardyń biri mergendigimen tanylǵan, QR UQK-niń «Shekarany úzdik kúzetkeni úshin» medaliniń ıegeri, aǵa serjant Mıra Omarova QazAqparat tilshisine bergen suhbatynda áskerı ómirdiń ereksheligimen bólisti.

«Áskerı ómir qıyn dep aıta almaımyn. Men ata-anam qarsy bolsa da, mektep bitirgennen keıin sportshy bolýdy armandap, dene shynyqtyrý mamandyǵyn tańdadym. Sporttaǵy jetistikterimnen keıin áskerı qyzmetke shaqyrylyp, búginde osy akademııada kelisimshartpen qyzmet etip jatyrmyn. Mergendigimmen birneshe saıysta daralanyp shyqtym. Eń birinshi, 2007 jyly Qyzylordadaǵy 2019 áskerı bólimi atynan Ońtústik aımaqtyq basqarmasyna qarasty 8 áskerı bólim ishinen «Makarov» tapanshasymen «ondyqqa» dál tıgizip, úzdik shyqtym. 

Sodan keıin Qazaqstan shekarashylarynyń arasyndaǵy úlken saıysta da birinshi orynǵa ıe boldym. Osydan keıin Máskeýde ótken TMD shekarashylary arasynda ótken saıysta 2-shi oryndy aldym. 2017 jyly QR ІІM tarapynan uıymdastyrylǵan áskerıler arasyndaǵy saıysta shekarashylardyń namysyn qorǵaýǵa bardym. Sonda birinshi oryn aldym. Osyndaı jarystardy jıi uıymdastyrsa degen tilegim bar. Bul jarystar óte qyzyqty ótetin edi. Basshylar osy sporttyq saıystarǵa kóńil bólse. Ózimdi Mánshúk Mámetova, Álııa Moldaǵulova syndy apalaryma uqsatamyn. Eger sol zamanda ómir súrsem solardaı bolar ma edim...», - dedi Mıra Ospanova.

Shekarashylardyń merekelik keshinde áıelder taqyrybynda jazylǵan ánder oryndalyp, syılyqtar tartý etildi.