Almatyda «Shańyraq-1» jáne «Shapaǵat» shaǵynaýdandarynda 32 shaqyrym jańa jol salynady
«Alataý aýdanyna alǵash kelgen kezimde «Shańyraq-1» shaǵynaýdanynyń turǵyndary ortalyq Ótemisuly kóshesine jóndeý júrgizý týraly ótinish bildirgen bolatyn. Turǵyndardyń osy ótinishin eskere otyryp, Almaty qalasynyń ákimdigi ál-Farabı dańǵylyn jóndeýge josparlanǵan qarajattyń bir bóligin aldy. Bul qarajattardy magıstraldyq mańyzy bar Ótemisuly kóshesin ortasha jóndeýge baǵyttaý týraly sheshim qabyldady. Jumystar bastalyp ta ketti, ony bıyl qyrkúıekte aıaqtaımyz»,- deıdi Almaty ákimi.
Sonymen qatar, ol Raıymbek dańǵylynda ortasha jóndeý jumystary bastalǵanyn málim etti.
«Tamyz aıynda Rysqulov dańǵylyndaǵy asfalt tósemin aýystyrýdy bastaımyz. Bul ýchaskeler osy jyldyń qarasha aıyna deıin tolyǵymen aıaqtalady. Sonymen qatar, qarasha aıynda 7 shaǵynaýdanda uzyndyǵy 53 km astam 47 kóshedegi joldardy ortasha jóndeý aıaqtalady. Olar «Aqbulaq», «Darhan», «Saıaly», «Uljan», «Ójet», «Kók-Qaınar», 14-shi aýmaqta ornalasqan»,- dedi Erbolat Dosaev.
Budan bólek, qarasha aıynyń ortasyna deıin «Alǵabas» shaǵynaýdanynda uzyndyǵy 10 shaqyrym joldyń qurylysy aıaqtalady. «Shańyraq-1» jáne «Shapaǵat» shaǵynaýdandarynda ortalyq sýmen jabdyqtaý jáne káriz jelileri tóselgennen keıin 32 shaqyrym jańa jol salynady.