Almatyda senbi-jeksenbide aýyl sharýashylyǵy ónimderiniń jármeńkesi ótedi

ALMATY. QazAqparat – Demalys kúnderi Almaty qalasynyń eki aýdanynda Jambyl oblysy fermerleriniń qatysýymen keńeıtilgen jármeńke ótedi, dep habarlaıdy QazAqparat tilshisi.

Megopolıste azyq-túlik beldeýin qurý jáne Jambyl oblysy men Almaty qalasy arasynda óńiraralyq yntymaqtastyqty damytý aıasynda 17-18 qazan kúnderi «Astana» ortalyq alańynda (Abylaı han dańǵylynan Nazarbaev dańǵylyna deıin) jáne «Alataý» (Nurkent yqshamaýdany, 6) kontsert zalynyń janynda aýyl sharýashylyǵy ónimderiniń jármeńkesi ótedi.

Jambyl oblysy ónim óndirýshileri jármeńkege jalpy quny 162,1 mln teńgeni quraıtyn 360 tonnadan astam aýyl sharýashylyǵy ónimderin usynady.

Onyń ishinde 36 tonna et (jylqy, sıyr, qoı eti jáne taýyq eti), 9 tonna shujyq ónimderi, 27 tonna sút ónimderi, 10 myń dana jumyrtqa, 3 tonna kondıterlik ónimder men 9 tonna makaron ónimderi, 10 tonna qant, 4 tonna un, 1 tonna tuz, 5 tonna balyq, 11 tonna ósimdik maıy, 6,5 tonna bal, 1,0 tonna keptirilgen jemis jáne 82,3 tonna jemis-jıdek pen kókónis ónimderi bar.

Jambyl oblysy ákimdiginiń habarlaýynsha, jármeńkede usynylatyn ónimderdiń baǵasy naryq baǵasynan 8-20 paıyz tómen bolady.

Aýyl sharýashylyǵy jármenkesi tańǵy 8:00-den keshki saǵat 17:00 deıin 2 kún boıy ótedi.

Aıta keteıik, shara ótetin nysandarda sanıtarlyq-epıdemıologııalyq normalardy, onyń ishinde maska rejımin, qol gıgıenasyn jáne áleýmettik qashyqtyqty berik ustaný qatań talap etiledi.