Almatyda Saıran kóliniń jaǵalaýy abattandyrylady

ALMATY. QazAqparat - Almaty qalasynyń ákimi Áýezov aýdany turǵyndarmen kezdesý barysynda Saıran kólin abattandyrý men túıtkildi máselelerdi sheshýge jeke-jeke toqtaldy, dep habarlaıdy QazAqparat tilshisi.

Erbolat Dosaevtyń aıtýynsha, bıyl Saıran kólin abattandyrý, sonyń ishinde kóldiń túbin tazartý jáne jaǵalaý aımaǵyn kógaldandyrý jumystary josparlanǵan.

«Búgingi tańda Saıran kóliniń bógetterine kópfaktorly zertteý júrgizildi. Bıyl shilde aıynda jobalyq-saraptamalyq jumysqa qatysty memlekettik saraptamanyń qorytyndysyn alamyz. Jaǵalaý aımaǵyn retke keltirý boıynsha jobalyq-smetalyq qujattamany ázirleý jáne memlekettik saraptamadan ótý máselesi qyrkúıek aıynda aıaqtalady dep oılaımyn», - dedi Erbolat Dosaev.

Almaty ákimi III toqsanda Saıran kóliniń túbin tazartý jáne abattandyrý úshin qurylys-montaj jumysyna qarjy bólý máselesi qaralatynyn jetkizdi.