Almatyda saılaý kúnine daıyndyq qalaı júrip jatyr – fotoreportaj
Almaty aýmaqtyq saılaý komıssııasy tóraǵasynyń orynbasary Aıgúl Qalyqovanyń aıtýynsha, megapolıste Prezıdent saılaýyna baılanysty 600 saılaý komıssııasy quryldy. Segiz aýdandyq jáne bir qalalyq saılaý komıssııasy jumystaryn bastady. Barlyǵy – 4 759 adam.
«Aldaǵy QR Prezıdentiniń kezekten tys saılaýyna daıyndyq Ortalyq saılaý komıssııasy bekitken kúntizbelik josparǵa sáıkes júrgiziledi. Barlyq is-sharalar josparǵa saı oryndalyp jatyr. Qalada 600 saılaý ýchaskesi quryldy, onyń ishinde 69-y azamattardyń ýaqytsha turatyn jerinde, 531-i turǵyndardyń turaqty tirkelgen jerinde», - dedi Aıgúl Qalyqova.
Spıkerdiń aıtýynsha, ýchaskelik saılaý komıssııalary óz jumystaryna kiristi.
«Saılaýshylardyń tizimi retteldi. Árbir saılaýshy kelip, ózin saılaýshylar tizimine engizýdiń durys-burystyǵyn teksere alady. Eger qandaı da bir qatelikter bolsa, olar jazbasha ótinishpen júgine alady. Bul rette komıssııanyń sheshimimen saılaýshylar tizimine ózgeris engiziledi», - dedi ol.
Sondaı-aq, Aıgúl Qalyqova 4 qarashadan bastap saılaýshylarǵa daýys berý quqyǵyn beretin esepten shyǵarý kýálikteri berilip jatqanyn atap ótti. 16 qarashadaǵy jaǵdaı boıynsha 694 adam kýálik aldy.
«Esepten shyǵarý kýálikteri 19 qarasha saǵat 18:00-ge deıin beriledi. Daýys beretin kúni basqa qalada nemese eldi mekende bolatynyn biletin azamattar ótinish berýge, tirkeýden ótkendigi týraly kýálikti alýǵa jáne Qazaqstan Respýblıkasynyń kez kelgen saılaý ýchaskesinde daýys berýge quqyly. Esepten shyǵarý kýáligi bir eldi meken shegindegi basqa ýchaskede daýys berýge qatysqysy keletin azamattarǵa berilmeıdi», - dep túsindirdi spıker.
Aıtýynsha, búgingi kúni barlyq saılaý ýchaskeleri saılaý jáshikterimen, memlekettik rámizdermen jabdyqtalǵan. Sondaı-aq, kandıdattar týraly aqparattyq materıaldarmen, saılaýshylardy qyzyqtyratyn ádistemelik quraldarmen qamtamasyz etilgen.
Kórý qabileti buzylǵan adamdar úshin Braıl shrıftimen trafaretter ázirlendi. Erekshe qajettilikteri bar adamdarǵa arnalǵan buryshtar daıyndaldy. Onda aqparattyq materıaldary bar beıne jáne aýdıo rolıkter men pandýstar qarastyrylǵan.
«Densaýlyq jaǵdaıyna baılanysty saılaý aýmaqtaryna kele almaıtyn turǵyndardyń úı jaǵdaıynda tańdaý jasaý múmkindigi bar. Ol úshin turǵyn óziniń saılaý komıssııasyna aryz jazýy kerek. Ótinishter 20 qarasha saǵat 12:00-ge deıin qabyldanady», - dedi Aıgúl Qalyqova.
Eske salaıyq, QR Prezıdentiniń kezekten tys saılaýy 20 qarashada ótedi.
Búgingi kúni Almaty qalasynda saılaýshylar sany 1 mıllıon 170 myńnan asty.