Almatyda saılaý barysyn baqylaý boıynsha respýblıkalyq komıssııanyń fılıaly quryldy

ALMATY. QazAqparat - Almatyda QR Parlamentiniń Májilisi men barlyq deńgeıdegi máslıhattar saılaýy barysyn baqylaý boıynsha respýblıkalyq komıssııanyń fılıaly qurylyp, óz jumysyn bastady. Bul týraly búgin Almatyda ótken baspasóz máslıhaty barysynda osy komıssııa tóraǵasynyń orynbasary, «Zańgerler ádiletti saılaý úshin» respýblıkalyq qoǵamdyq birlestiginiń tóraǵasy Ómiráli Qopabaev málim etti.

«Saılaý barysyn baqylaý boıynsha respýblıkalyq komıssııa ústimizdegi jyldyń 5-shi aqpanynda Astanada óz jumysyn bastaǵan bolatyn. Endi mine, Almatyda komıssııanyń fılıaly ashylyp, shtaby quryldy. Ol D. Qonaev atyndaǵy Eýrazııalyq zań akademııasynda ornalasqan. Bizdiń basty maqsatymyz - saılaýshylardyń quqyqtyq saýattylyǵyn arttyrýǵa kúsh salý. Bul úshin árıne, saılaýshylar arasynda «Saılaý týraly» zańnamany, Ata zańnyń tıisti tarmaqtaryn jan-jaqty túsindirýimiz qajet. Óıtkeni, quqyqtyq saýattylyǵy joǵary saılaýshylardyń ǵana qoǵamdyq belsendiligi, saılaýǵa degen jaýapkershiligi arta túsedi. Al bul, ıaǵnı saılaýshylardyń quqyqtyq turǵydan saýatty bolýy - saılaýdyń ádil ótýine septigin tıgizedi», - dedi Ó. Qopabaev.

Sonymen qatar, ol ústimizdegi jyldyń 20 naýryzynda ótetin saılaý kúni Almaty qalasynyń barlyq saılaý ýchaskelerinde atalmysh komıssııa men «Zańgerler ádiletti saılaý úshin» respýblıkalyq qoǵamdyq birlestiginiń baqylaýshylary bolatyndyǵyn jetkizdi.

«Qazir biz baqylaýshylar pýlyn qalyptastyryp jatyrmyz. Olardyń arasynda zańgerler, joǵary oqý oryndarynyń zań fakýltetteriniń oqytýshylary men 3-4-shi kýrs stýdentteri bolady. Aldaǵy ýaqytta olardyń biliktiligin arttyrý boıynsha bizdiń shtabta oqytý semınarlary ótkiziledi. Al saılaý kúni olar barlyq saılaý ýchaskelerinde saılaýdyń ashyqtyǵyn qamtamasyz etý maqsatynda ózderine tıesili mindetterin atqarýǵa kirisedi. Sondaı-aq, biz búginnen bastap, saılaýshylarmen jumys júrgize bastaımyz. Olardyń suraqtaryna, aryz-shaǵymdaryna jan-jaqty jaýap beremiz», - dedi Ó. Qopabaev.