Almatyda saıası partııalar máslıhat depýtattyǵyna úmitkerlerdiń tizimin jasady

ALMATY. QazAqparat - Almaty boıynsha 5 saıası partııanyń fılıaly Almaty qalasy máslıhaty depýtattyǵyna kandıdattardyń partııalyq tizimin usyndy. Bul týraly Almaty qalasy aýmaqtyq saılaý komıssııasynyń tóraıymy Janna Asanova onlaın brıfıng barysynda aıtty, dep habarlaıdy QazAqparat tilshisi.

Spıkerdiń aıtýynsha, «Nur Otan» partııasy» - 15 qarashada 78 adamǵa, «Aýyl» halyqtyq-demokratııalyq patrıottyq partııasy» - 25 qarashada 6 adamǵa, «Aq jol» QDP - 30 qarashada 15 adamǵa, «Qazaqstannyń Halyq partııasy» - 3 jeltoqsanda 15 adamǵa, «Adal» saıası partııasy» 4 jeltoqsanda 2020 jyly 5 adamǵa tizim bergen.

Almaty qalalyq máslıhatyndaǵy 39 depýtattyq mandatqa barlyǵy 119 adam usynyldy.

«Qazaqstan Respýblıkasyndaǵy Saılaý týraly» Konstıtýtsııalyq Zańnyń 102-babyna sáıkes, máslıhat depýtattyǵyna úmitkerlerdiń belgilengen talaptarǵa sáıkestigi anyqtaldy. Ol týraly Almaty qalasy aýmaqtyq saılaý komıssııasynyń tıisti qaýlylary qabyldandy.

«Qazaqstan Respýblıkasyndaǵy Saılaý týraly» Qazaqstan Respýblıkasy Konstıtýtsııalyq Zańynyń 105-baby 1-tarmaǵyna sáıkes Jaqypbekov Asan Amangeldiulynyń 2020 jylǵy 8 jeltoqsandaǵy ótinishi negizinde Almaty qalasynyń aýmaqtyq saılaý komıssııasy ony «Qazaqstannyń Halyq partııasy» qoǵamdyq birlestiginiń Almaty qalalyq fılıalynyń partııalyq tiziminen shyǵarý týraly qaýly qabyldady.

«Osylaısha, úmitkerlerdiń jalpy sany 118 boldy. Qajetti qujattardy tapsyrǵannan keıin, sondaı-aq saılaý jarnasyn engizgennen keıin barlyq partııalyq tizimder tirkeldi. Partııalar 29 jasqa tolmaǵan jastar men áıelderdiń kvotasy boıynsha talaptardy oryndaǵanyn atap ótý qajet», - dedi Janna Asanova.

Onyń aıtýynsha, «Nur Otan» partııasy boıynsha 78 adamnyń 29-y kvota boıynsha ótedi (37,2%). Áıelder - 27 adam, erler - 51 adam. Usynylǵan eń kishi úmitkerdiń jasy - 20 jas, eń úlkeni - 64 jas.

«Aýyl» HDPP kvota boıynsha 6 adamnan 2 adam nemese 33,3 % ótedi, ekeýi de - áıel. Erler tıisinshe 4 adam. Eń kishisi - 28 jasta, eń úlkeni - 52 jasta.

«Adal» saıası partııasynan kvota boıynsha 3 adam nemese 60% ótedi. 2 er, 2 áıel adam. Eń kishisi – 24 jasta, eń úlkeni - 45 jasta.

«Aq jol» QDP kvota boıynsha 6 nemese 40% ótedi. Eń kishisi - 22 jasta, eń úlkeni - 70 jasta.

QHP kvota boıynsha 6 adam nemese 42,9% ótedi. Eń kishisi - 20 jasta, eń úlkeni - 64 jasta.

118 adamnyń 46-sy qajetti kvotaǵa kiredi, bul barlyq úmitkerlerdiń 39%-y bolyp otyr.

Qazirgi ýaqytta memlekettik kiris organdary kandıdattar jarııalaǵan kirister men múlik týraly málimetterdiń durystyǵyn tekserip jatyr.