Almatyda saıası qýǵyn-súrgin qurbandaryn aqtaý jónindegi komıssııa otyrysy ótti

ALMATY. Qazaqparat - Almaty ákiminiń orynbasary, Almaty qalasy ákimdigi janyndaǵy saıası qýǵyn-súrgin qurbandaryn aqtaý máseleleri jónindegi qalalyq komıssııanyń tóraǵasy Erjan Babaqumarovtyń tóraǵalyǵymen saıası qýǵyn-súrgin qurbandaryn aqtaý jónindegi qalalyq komıssııanyń tórtinshi otyrysy ótti, dep habarlaıdy QazAqparat tilshisi.

Otyrysqa qalalyq komıssııanyń barlyq 9 jumys tobynyń, «Rýhanı jańǵyrý» jobalyq keńsesi» KMM basshylary qatysty.

Jıynda toptardyń zertteý jumystarynyń barysy, sondaı-aq ǵalymdardyń jumysyn uıymdastyrý, muraǵattardan qajetti qujattardy alý, ǵylymı jınaqtardy, ǵylymı-zertteý is-saparlaryn daıyndaý boıynsha máseleler qaraldy.

Qalalyq komıssııa tóraǵasynyń orynbasary, tarıh ǵylymdarynyń doktory B. Jangýttın saıası qýǵyn-súrgin qurbandaryn aqtaý boıynsha tulǵalar men jańa sanattardy anyqtaý boıynsha jumystyń aldyn ala nátıjeleri, jobalar, izdestirý jáne ǵylymı qyzmet týraly baıandady.

Otyrys barysynda saıası qýǵyn-súrgin qurbandaryn aqtaý boıynsha zertteý jumystary týraly baıandaǵan jumys toptarynyń jetekshileri Sh. Zabıh, M. Gýbaıdýllına, A. Óteǵalıeva, N. Alpysbaeva B. Kabdýshev, G. Nurymbetova, G. Muqanova, T. Qultaev, Z. Tólenova baıandama oqydy.