Almatyda «Saýna ǵımaratynda balalar lagerin» uıymdastyrý isi boıynsha tergeý bastaldy

ALMATY. QazAqparat - Almaty qalasynyń prokýratýrasy «Saýna ǵımaratynda balalar lagerin» uıymdastyrý kezinde laýazymdyq ókilettikterdi teris paıdalaný (QR QK 361-baby) jáne kámeletke tolmaǵan adamdy tárbıeleý jónindegi mindetterdi oryndamaý (QR QK 140-baby) faktileri boıynsha sotqa deıingi tergeýdi bastady, dep habarlaıdy QazAqparat tilshisi.

Almaty qalalyq prokýratýranyń málimetinshe, lagerdi qarjylandyrý jetim balalar men ata-anasynyń qamqorlyǵynsyz qalǵan balalarǵa arnalǵan Almaty qalasy Bilim basqarmasynyń bıýdjetinen júzege asyrylǵan. Bul rette usynylǵan konkýrstyq qujattama qoıylatyn talaptarǵa tolyǵymen sáıkes kelmegen. Qylmystyq isterdi tergeý Almaty qalasynyń sybaılas jemqorlyqqa qarsy qyzmetine tapsyryldy.

«Іsterdi tergeý sheńberinde bolǵan oqıǵanyń mán-jaıy anyqtalyp, jergilikti atqarýshy organnyń laýazymdy adamdary men lager uıymdastyrýshylarynyń is-áreketterine baǵa beriletin bolady. Ózge aqparattar QR Qylmystyq is júrgizý kodeksiniń 201-babynyń talaptaryna sáıkes jarııa etýge jatpaıdy. Atalǵan ister prokýratýra organdarynyń erekshe baqylaýynda», - dep habarlady Almaty qalasynyń prokýratýrasy.

Eske salsaq, almatylyq oqýshylardyń demalýǵa jazǵy lagerge emes, saýnaǵa jiberilgenin habarlaǵanbyz.