Almatyda saýda ortalyqtary men sulýlyq salondary qandaı jaǵdaıda ashylmaq

ALMATY. QazAqparat - Almaty qalasy sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova qalada saýda ortalyqtary, balabaqsha men bilim ortalyqtary qandaı jaǵdaıda ashylatynyn aıtty, dep habarlaıdy QazAqparat tilshisi.

«Almaty naýryzdan beri epıdemıologııalyq jaǵdaıdy baǵalaý matrıtsasynda «qyzyl» aımaqta. Barlyq shekteý sharasy osyǵan saı engizilip jatyr. Al qalypty jumysqa oralý boıynsha jaýapkershilik turǵyndardyń, bizdiń moınymyzda. Shaǵyn jáne orta bıznes nysandarynan koronavırýs taralý ındeksi tómendemeıinshe shekteýler alynbaıdy», - dedi Ásel Qalyqova.

Al shekteý sharalaryn jeńildetý týraly sheshim qalada táýligine koronavırýs juqtyrǵandar sany azaısa, vırýstyń taralý ındeksi tómendese ǵana qaralatyny aıtyldy.

«Biraq vırýstyń negizgi taralatyn oryndary qoǵamdyq jerler, saýda ortalyqtary, saýda úıleri, basqa da qoǵamdyq tamaqtaý oryndary, sán salondary ekenin kórip otyrmyz. Sondyqtan jaýapkershilik ekijaqty ekenin qaıtalap aıtqym keledi. Kásipker qyzmetkerlerge de, turǵyndarǵa da normalardy saqtaýǵa jaǵdaı jasaýy kerek», - dedi ol.

Aıta keteıik, Almaty 10 naýryzdan beri «qyzyl» aımaqta. Karantın sharalary 12 sáýirge deıin uzartyldy.

Qaýlyǵa sáıkes, JOO men kolledj stýdentteri, jalpy bilim beretin mektep oqýshylaryn qashyqtan oqytý formatyna aýystyrylady.

Sondaı-aq ata-anasynyń ótinishi boıynsha jalpy bilim beretin mektepterdiń 1-5, 9 jáne 11-synyptarda bala sany 15-ke deıin bolatyn kezekshi toptardy qurýǵa ruqsat berilgeni belgili boldy.