Almatyda Sarybaevtar áýleti kórnekti ókilderiniń qurmetine eskertkish taqtalar ornatyldy

ALMATY. QazAqparat - Almatyda QR Ulttyq ǵylym akademııasynyń akademıgi, professor Shora Sarybaevtyń, qazaqtyń ulttyq mýzykalyq aspaptaryn zertteýshi, Qazaq ulttyq konservatorııasynyń professory Bolat Sarybaevtyń jáne belgili kompozıtor jáne zertteýshi Talǵat Sarybaevtyń qurmetine eskertkish taqtalar qoıyldy, dep habarlaıdy QazAqparat tilshisi Almaty ákimdigine silteme jasap.

Eskertkish taqtalar Abylaı han dańǵyly, 113 meken-jaıdaǵy úıdiń qabyrǵasyna ornatyldy. Munda Sarybaevtar áýletiniń ókilderi ár jyldary ómir súrgen.

Saltanatty sharaǵa Almaty qalasynyń ákimi Erbolat Dosaev, Qazaqstannyń halyq ártisi Roza Rymbaeva, memleket jáne qoǵam qaıratkeri, dıplomat Qaırat Sarybaı, ál-Farabı atyndaǵy QazUÝ rektory Janseıit Túımebaev, Sarybaevtardyń týystary men jaqyndary, zııaly qaýym ókilderi, Almaty turǵyndary qatysty.

Óz sózinde Almaty ákimi Erbolat Dosaev Shora, Bolat jáne Talǵat Sarybaevtardyń qurmetine memorıaldyq taqtalardyń ashylýy Almaty úshin mańyzdy oqıǵa, olardyń árqaısysy elimizdiń ǵylymy men mádenıetin damytýǵa qosqan úlesteri zor ekenin atap ótti.

«Zertteýshi ǵalym Shora Sarybaev 60 jylǵa jýyq Baıtursynov atyndaǵy Til bilimi ınstıtýtynda jumys istegen. Óziniń artynan 300-den astam iri eńbekti qaldyrdy. Akademıktiń artynda qalǵan murasy onyń tereń bilimdi, parasatty ǵalym bolǵanyn kórsetedi. Onyń eńbekteriniń taqyryby qazaq til biliminiń leksıkologııa, leksıkografııa, grammatıka, dıalektologııa, til tarıhy sııaqty salalardy qamtıdy. Budan basqa, Shora Sarybaev Qazaqstandaǵy bıblıografııanyń bastaýynda turdy. Ǵylymnyń damýyna qosqan úlesi úshin Shora Sarybaev túrli nagradalarmen, ataqtarmen marapattaldy, olardyń arasynda «Qurmet», «Parasat» jáne t. b. ordender bar.

Bolat Sarybaev óz ómirin tereń úderisterdi zertteýge jáne ǵylymdy damytýǵa arnady. Belgili ǵalym, mýzykatanýshy jáne kollektsıoner ulttyq mýzykalyq aspaptardyń baı murasyn saqtap qaldy. Onyń kollektsııasynda tórt júzge jýyq eksponattar bar. Olardyń barlyǵy Qazaqstan Respýblıkasynyń Ulttyq mýzeıinde saqtaýly.

Bolat Sarybaevtyń isin onyń uly Talǵat jalǵastyrdy. Ol «Jetigen», «Gúlder» jáne «Araı» ansamblderin qurdy jáne olardyń basshysy boldy, onda Qazaqstannyń halyq ártisi Roza Rymbaeva jeke án aıtty. Talǵat Sarybaev keremet mýzyka óńdeýshi retinde halyq ánderiniń tutas toptamasyn jasady. Kóne mýzykalyq aspaptardy jınap, olardyń jandanýyna yqpal etti ári qazaq ónerine jańa serpin berdi. Talǵat Sarybaevtyń shyǵarmashylyǵy týraly «Ótken kúnder», «Úıge hat», «Meniń mahabbatymnyń aılaǵy», «Bári sen úshin», «Meniń dosym», «Otandastar», «Senimen birgemin», «Eski telefon» sııaqty kompozıtsııalar únemi eske túsedi – olar tek Qazaqstanda ǵana emes, sonymen qatar shetelderge de keńinen tanymal», - dep habarlady ákimdiktiń baspasóz qyzmeti.

Eskertkish taqtalardyń ashylýy aldynda Shora men Bolat Sarybaevtardyń ákesi – Shamǵalı Haresuly Sarybaevtyń týǵanyna 130 jyl tolýyna oraı derekti fılm kórsetildi.