Almatyda Rýhanı kelisim kúni atalyp ótti
Megopolıste din salasynda nátıjeli eńbek etip júrgen mamandar marapattaldy. Sondaı-aq, Rýhanı kelisim kúnin merekeleý aıasynda qalalyq Qoǵamdyq damý basqarmasynyń bastamasymen «Qazaqstan Respýblıkasyndaǵy lańkestik jáne ekstremızm máselelerin zertteý ortalyǵy» QQ jáne Almaty qalasyndaǵy dinı birlestikter jetekshiler klýby arnaıy kórme uıymdastyrdy
Sharaǵa Almaty qalasy ákiminiń orynbasary Erjan Babaqumarov qatysty. Onyń aıtýynsha, Elbasynyń ultaralyq jáne konfessııaaralyq tatýlyqty saqtaýǵa negizdelgen saıasaty qoǵamdaǵy tynyshtyqtyń kepili bolyp keledi.
«Almaty qalasynda elimizdiń eń iri dinı birlestikteri, rýhanı ortalyqtary shoǵyrlanǵan. Qalada ıslam, hrıstıan, ıýdaızm, býddızm syndy álemdik jáne dástúrli dinderdiń ókilderi kóp. Osyǵan oraı búgin elimizde Rýhanı kelisim kúni keń kólemde atalyp ótýde. Bul merekeniń 27 jyldyq tarıhy bar. Esterińizde bolsa eń alǵash 1992 jyly Almatyda Elbasynyń qatysýymen І áleýmettik kongress ótken bolatyn. Sol jyldan beri Rýhanı kelisim kúni dástúrli túrde atalyp ótýde. Maqsaty – elimizdegi mádenıetaralyq jáne konfessııaaralyq dıalogty nyǵaıtý. Sonymen qatar, eń basty qundylyǵymyz – turaqtylyqty saqtaý»,- dedi qala ákiminiń orynbasary Erjan Babaqumarov.
Bul ıdeıa Elbasynyń bastamasy boıynsha rýhanı úılesimdilikti uıymdastyrý týraly máselesinen týyndaǵan bolatyn. Sondaı-aq, adamzattyń bolashaǵyna baǵyttalǵan osy bastama – qazirgi jáne keleshektegi jahandyq qaýip-qaterlerdi eńserýge baǵyttalǵan perspektıvalyq bastama ekenin anyq.
«18 qazan kúnin Rýhanı kelisim kúni dep jarııalaýǵa shaqyrǵan manıfest qabyldandy. Osy kezden bastap Qazaqstanda 18 qazan kúni Rýhanı kelisim kúni retinde toılanyp keledi. Bizdiń elimizde 130 etnos pen 18 konfessııa ókilderi ómir súredi. Qazaqstan ultaralyq jáne konfessııaaralyq kelisimniń biregeı úlgisin jasady – muny halyqaralyq sarapshylar da moıyndap otyr. Etnosaralyq jáne konfessııaaralyq kelisimdi saqtaýdaǵy qazaqstandyq joldy qazirgi kezde kóptegen elder úlgi tutýda»,- dedi Rım-katolık shirkeýiniń ókili Karlos Laos.
Qazaqstanda din bostandyǵy bar jáne kez kelgen adam ózine jaqyn dindi tańdaı alady. Biraq, eń bastysy, ol – adamdardyń taǵdyryn ózgertpeýi, memlekettik saıasatqa qarsy bolmaýy, minezin buzbaýy tıis. Qazirgi kezde dinniń ahýaly dinı birlestikterdiń udaıy ósýimen ǵana emes, dinı qurylymdardyń beleń alǵan belsendiligimen de sıpattalady.
«Biz – dos bolam degen adamǵa qushaǵyn aıqara ashqan keń peıil halyqpyz. Kóńilimizben pıǵylymyz qandaı keń bolsa Jaratýshy ıemizde bizge sondaı ulanǵaıyr jerdi enshimizge buıyrtqan. Bul jaı ásheıin kezdeısoqtyq emes ekeni tarıhtan habary bar adamnyń bárine aıan. Ult pen ulystar arasyndaǵy tatýlyq turaqty bolyp, elimiz aman jurtymyz tynysh bolsyn!», - deıdi saltanatty sharaǵa qatysqan Almaty qalasynyń bas ımamy Erkinbek Shoqaı.
Rýhanı kelisim kúninin toılaýǵa kelgen qatysýshylar, Qazaqstan zaıyrly memleket. Tatýlyq, aýyzbirlik, meıirim men kishipeıldiliktiń úlgisi bolǵan el ekenin atap ótti.
«Bizdiń ásem Almatyda dinı birlestikter jetekshileriniń klýby bar. Onyń qurylǵanyna úsh boldy. Klýb túrli din ókilderi dinı jáne áleýmettik máselelerdi talqylaıtyn, erkin pikir almasatyn alańǵa aınaldy. Biz aıtýly dinı merekelerge qatysamyz, bir-birimizge qurmet kórsetemiz, barlyq mańyzdy memlekettik merekelerdi birge toılaımyz. Sondaı-aq, sporttyq sharalar ótkizip, ǵylymı konferentsııalarǵa qatysamyz.Bizdiń maqsatymyz - tatýlyqty nyǵaıtý, beıbit zamanda ómir súrý jáne barlyq dinge qurmetpen qaraý. Bizdi ortaq bir nárse baılanystyrady. Ol qudaıǵa sený, óz dinińe berik bolý», - deıdi Evangelı hrıstıan – baptıster shirkeýi birlestiginiń Almaty jáne Almaty oblysynyń presvıteri Alekseı Lýboshnıkov.
Almaty qalalyq Qoǵamdyq damý basqarmanyń málimetinshe, qalada 17 konfessııanyń 180 dinı birlestigi tirkelgen.
Aıta keteıik, merekelik shara aıasynda taqyryptyq kitaptardyń jáne fotosýretterdiń kórmesi, kontserttik baǵdarlama uymdastyryldy. Al, kezdesýge jınalǵan ǵalymdar men din ókilderi Qazaqstanda beıbitshilik ıdeıalaryn qalyptastyrý jáne nyǵaıtýdaǵy dinderdiń rólin eskerip, halyqty yntymaqqa, aýyzbirshilikke shaqyrdy.
Sharany Qoǵamdyq damý basqarmasynyń qoldaýymen «Qazaqstan Respýblıkasyndaǵy lańkestik jáne ekstremızm máselelerin zertteý ortalyǵy» qoǵamdyq qory jáne Almaty qalasyndaǵy dinı birlestikter jetekshileriniń klýby uıymdastyrdy.