Almatyda Rozybakıev kóshesi eki aıǵa jabylady
19:18, 03 Shilde 2021
ALMATY. QazAqparat - Almatyda Rozybakıev kóshesiniń bir bóligi ýaqytsha jabylady, dep habarlaıdy QazAqparat tilshisi.
«Almaty jylý júıesi» kásipornynyń málimetinshe, 2021 jyldyń 5 shildesi men 1 qyrkúıegi aralyǵynda Rozybakıev kóshesiniń boıy Dúısenov kóshesinen Raıymbek dańǵylyna deıin jabylady.
«Ýaqytsha shekteýler osy kóshedegi joldyń astynda ornalasqan magıstraldyq qubyrdy josparly aýystyrýǵa baılanysty qabyldanyp otyr. Jergilikti turǵyndarǵa qolaıly jaǵdaıdy saqtaý úshin úılerge ystyq sý ýaqytsha shema boıynsha beriletin bolady», - delingen habarlamada.
Kompanııa qolaısyzdyq úshin almatylyqtardan keshirim suraıdy.
Sonymen qatar, júrgizýshilerge jol júrý baǵytyn aldyn ala josparlaýǵa keńes berdi.