Almatyda rejısser Májıt Begalınniń 100 jyldyq mereıtoıy atalyp ótti

ALMATY. QazAqparpt- Almaty qalasyndaǵy Májıt Begalın atyndaǵy №120 mektep-gımnazııada «Qazaqfılm» kınostýdııasynyń qoldaýymen belgili kınorejısserdiń 100 jyldyq mereıtoıyna oraı merekelik kontsert ótti, dep habarlaıdy QazAqparat tilshisi.

Kınostýdııanyń baspasóz qyzmeti málim etkendeı, atalǵan sharaǵa Májıt Begalınniń týystary – Gúlnár, Aıjan jáne Aıdar Begalınder, KSRO halyq artısi, Qazaqstannyń Eńbek Eri, kınostýdııanyń kórkemdik jetekshisi Asanáli Áshimov, derekti kıno rejısseri Bolat Núsimbekov, sondaı-aq «Qazaqfılmniń» vıtse-prezıdentteri Aıdarhan Ádilbaev jáne Aıdar Batalov qatysty.

Mádenı is-shara aldynda qonaqtar Májıt Begalınniń qujattary, jeke zattary, nagradalary, sýretteri men keıbir fılmderiniń posterleri saqtalǵan mekteptiń mýzeıin aralap, basqa da eksponattarmen tanysty.

Kınostýdııanyń vıtse-prezıdenti Aıdar Batalov rejısserdiń esimin ulyqtap júrgen ustazdarǵa alǵysyn bildirip, mektep dırektory Aısulý Botaevaǵa Sháken Aımanovtyń fılmderi kirgen DVD jınaǵyn tartý etti.

Qazaq kıno óneriniń sańlaǵy Asanáli Áshimovti mektep oqýshylary erekshe qoshemetpen qarsy aldy.

Óz sózinde tanymal akter osydan 10 jyl buryn mýzeıdiń ashylýyna qatysqanyn eske alyp, osyndaǵy jádigerler rejısserdiń inisi Qasym Begalınniń arqasynda jınalǵanyn aıtty.

Sondaı-aq Asanáli Áshimov Májıt Begalın týraly estelikterimen bólisip, mádenıetimizdiń damýyna ólsheýsiz úles qosqan uly qaıratkerlerdiń esimderin umytpaı, ulyqaýǵa shaqyrdy.

«Májıt Begalınniń 100 jyldyq mereıtoıyna oraı uıymdastyrylǵan osy sharaǵa qatysqanyma óte qýanyshtymyn. Ol menen 15 jas úlken bolsa da, bir-birimizben ońaı til tabystyq. Májekeń maǵan kóp nárse úıretti. Óte meıirimdi jáne bilimdi jan edi, tek qana shyndyqty aıtýǵa talpynatyn. Aramyzdan erte ketse de, qazaq kınosynyń tarıhynda úlken iz qaldyrdy», - dedi Asanáli Áshimov.

Mektep oqýshylary búgingi mereıtoıly keshte án aıtyp, bı bılep, óz ónerlerin pash etti.