Almatyda respýblıkalyq ákeler forýmy ótti
Alqaly jıynda otbasy ınstıtýtyn jáne otbasylyq tárbıedegi ákeniń rólin nyǵaıtý, «Rýhanı jańǵyrý» qoǵamdyq sanany jańǵyrtý aıasynda balalardyń patrıottyq sezimin qalyptastyrýǵa, bilimge umtylysty ósirýge qoǵamnyń nazaryn aýdarý máseleleri talqylandy.
Forýmnyń jumysyna QR Parlamentiniń depýtattary, ulttyq komıssııa músheleri, ortalyq memlekettik jáne jergilikti atqarýshy organdardyń basshylary, qoǵamdyq qaıratkerler, úkimettik emes uıymdardyń ókilderi, sonymen qatar úlgili ákeler - barlyq óńirden kelgen delegattar qatysty.
Ulttyq komıssııa tóraǵasynyń orynbasary, QR Ortalyq saılaý komıssııasynyń múshesi Lıazzat Súleımen óz sózinde, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń arqasynda qoǵamnyń rýhanı-adamgershilik túrlenýiniń negizgi baǵdarlary anyqtalǵandyǵyn atap ótti.
Naqtyraq aıtqanda, N.Nazarbaev «Bolashaqqa baǵdar: Rýhanı jańǵyr» maqalasynda: «Biraq, másele buǵan da tirelip turǵan joq. Sananyń ashyqtyǵy zerdeniń úsh ereksheligin bildiredi.
Birinshiden, ol dúıim dúnıede, Jer sharynyń ózińe qatysty aýmaǵynda jáne óz elińniń aınalasynda ne bolyp jatqanyn túsinýge múmkindik beredi.
Ekinshiden, ol jańa tehnologııanyń aǵyny alyp keletin ózgeristerdiń bárine daıyn bolý degen sóz. Taıaýdaǵy on jylda bizdiń ómir saltymyz: jumys, turmys, demalys, baspana, adamı qatynas tásilderi, qysqasy, barlyǵy túbegeıli ózgeredi. Biz buǵan da daıyn bolýymyz kerek.
Úshinshiden, bul - ózgelerdiń tájirıbesin alyp, eń ozyq jetistikterin boıǵa sińirý múmkindigi. Azııadaǵy eki uly derjava - Japonııa men Qytaıdyń búgingi kelbeti - osy múmkindikterdi tıimdi paıdalanýdyń naǵyz úlgisi.
«Ózimdiki ǵana tańsyq, ózgeniki - qańsyq» dep keri tartpaı, ashyq bolý, basqalardyń eń ozyq jetistikterin qabyldaı bilý, bul - tabystyń kilti, ári ashyq zerdeniń basty kórsetkishteriniń biri.
Eger qazaqstandyqtar jer júzine úıden shyqpaı, terezeden telmirip otyryp baǵa beretin bolsa, álemde, qurlyqta, tipti irgedegi elderde qandaı daýyl soǵyp jatqanyn kóre almaıdy.
Kókjıektiń arǵy jaǵynda ne bolyp jatqanyn da bile almaıdy. Tipti, birqatar ustanymdarymyzdy túbegeıli qaıta qaraýǵa májbúrleıtin syrtqy yqpaldardyń baıybyna baryp, túsine de almaı qalady», - dep jazǵan.
Jaqynda ótken TMD jáne JEEO elderi basshylary Keńesiniń otyrysynda otbasy ınstıtýtyn jáne dástúrli otbasylyq qundylyqtardy qoldaý týraly birikken málimdemeniń qabyldanǵandyǵy tekten tek emes ekenin jetkizdi.
Qazaqstandyqtardyń otbasylyq dástúrlerge beıimdiligi qoǵamda joǵary moraldyq qundylyqtardy jáne rýhanııatty saqtaýǵa yqpal etedi, bul jahandyq syn-qaterlerge qarsy turýǵa múmkindik beredi.
Qazirgi ýaqytta QR Prezıdentiniń Jarlyǵymen (2016 jylǵy 6 jeltoqsandaǵy №384) qabyldanǵan Qazaqstan Respýblıkasynda 2030 jylǵa deıingi otbasylyq jáne genderlik saıasattyń tujyrymdamasynyń birinshi kezeńi iske asyrylýda. Tujyrymdamada balanyń tárbıesindegi qos ata-ananyń jaýapkershiligin arttyrý, sonyń ishinde jaýapty ákelik ınstıtýtyn damytý jáne úlgili ákelerdi nasıhattaý máselesi alǵa qoıylǵan.
Qazaqstanda 70 belsendi ákelerdiń kúshimen «Ákeler odaǵy» qoǵamdyq birlestigi quryldy, ol otbasyn nyǵaıtý boıynsha tájirıbelik sharalardy iske asyrady. 8 aımaqta ókildikteri quryldy, sonyń ishinde búgingi kúni Astana, Almaty qalalarynda, Qaraǵandy jáne Mańǵystaý oblystaryndaǵy ókildikter belsendi bolyp tabylady, olar ákelik ınstıtýtty nasıhattaýmen qatar óńirlerde keıbir jaýapsyz ákelerdiń alıment tólemeýi, az qamtylǵan otbasylarǵa mekenjaılyq kómek kórsetý jáne t.b. sııaqty áleýmettik máselelerdi sheshedi. Ákeler odaǵynyń ókilderin ortalyq memlekettik jáne jergilikti atqarýshy organdarynyń janyndaǵy ártúrli saraptamalyq jumys toptaryna tartý iske qosyldy.
Forým aıasynda qatysýshylar «Reseı Federatsııasynyń ákeler odaǵy» aımaqaralyq qoǵamdyq uıymynyń atqarýshy dırektory ıÝrıı Solenovtiń usynǵan jumys tájirıbesimen tanysty.
Іs-sharanyń sońynda úzdik úlgili ákelerge Ulttyq komıssııanyń atynan Alǵys hattar tabys etildi.