Almatyda Respýblıka kúni qalaı merekelenedi

ASTANA. QazAqparat – Respýblıka kúnine arnalǵan merekelik jáne resmı is-sharalar Almatynyń barlyq segiz aýdanynda ótedi. Qalanyń ár jerinde túrli konkýrstar, kórmeler, jármeńkeler jáne basqa da mádenı-tanymdyq is-sharalar uıymdastyrylady. Bul týraly QazAqparat qala ákimdiginiń baspasóz qyzmetine silteme jasap habarlaıdy.

21 qazan kúni saǵat 11:00-de Qazaqstan-Brıtan tehnıkalyq ýnıversıtetiniń ál-Farabı atyndaǵy zalynda Respýblıka kúnine arnalǵan ǵylymı-praktıkalyq konferentsııa ótedi. Atalǵan is-sharaǵa XII shaqyrylymdaǵy QazKSR Joǵarǵy Keńesiniń tarıhı qujat qabyldanǵan burynǵy depýtattary, ǵylymı zııaly qaýym ókilderi, úkimettik emes uıymdar, Almaty máslıhatynyń, qalalyq memlekettik qurylymdardyń depýtattary qatysady.

22 qazan kúni saǵat 12:00-de Qazaqstan-Brıtan tehnıkalyq ýnıversıtetinde memlekettik jáne vedomstvolyq nagradalar, alǵys hattar saltanatty túrde tapsyrylady.

22 qazan kúni saǵat 17:00-de Respýblıka saraıynda qazaqstandyq estrada juldyzdarynyń qatysýymen saltanatty kontsert ótedi. Saltanatty kontsertke qala zııalylary, máslıhat depýtattary, memlekettik organdardyń, uıymdardyń ókilderi, saıası partııalardyń ókilderi, kórnekti memleket jáne qoǵam qaıratkerleri, stýdentter, áskerı qyzmetshiler shaqyrylady.

23 qazan kúni saǵat 7:00-den 13:00-ge deıin Charity Music Nur jappaı qaıyrymdylyq jarysy ótedi. Jarys Tuńǵysh Prezıdent saıabaǵynan bastalady. Qatysýshylardyń josparlanǵan sany – 1700-2000 adam. Jarys kelesi qashyqtyqtarda ótkiziledi: balalar jarysy (2 km – 7-14 jas), skandınavııalyq serýendeý (10,5 km), 10,5 km júgirý jáne 21 km. Qatysýshylardyń jıyny saǵat 6.00-de.

25 qazan kúni saǵat 10:00-de «Medeý» bıik taý kesheniniń aldyndaǵy alańda «Patrıotızm daýysy» aktsııasy aıasynda memlekettik Tý saltanatty túrde kóteriledi jáne Ánuran oryndalady. Saltanatty rásimde máslıhat depýtattary, memlekettik organdardyń, uıymdardyń ókilderi, saıası partııalardyń kóshbasshylary, kórnekti memleket jáne qoǵam qaıratkerleri, stýdentter, áskerı qyzmetshiler (qurmetti qaraýyl, áskerı-úrmeli orkestr) bolady.

Sondaı-aq, osy ýaqytta qalanyń barlyq aýdandarynda memlekettik Ánuran jappaı oryndalady. (Alataý aýdany – Almaty Arena muz saraıynyń aýmaǵynda, Almaly aýdany – QBTÝ ǵımaratynyń aldynda, Áýezov aýdany – Almaty kópsalaly kolledji ǵımaratynyń aldynda, Bostandyq aýdany – MEGA Almaty – Rozybakıeva, Jetisý aýdany – «Gúlder» saıabaǵy, Medeý aýdany – Ǵylym ordasy ǵımaratynyń aldyndaǵy alań, Naýryzbaı – aýdan ákimdigi ǵımaratynyń aldynda, Túrksib – Saýranbaev kóshesindegi Arbatta).

Ánurandy oryndaǵannan keıin JOO, kolledj jáne áskerı oqý oryndary stýdentteriniń qatysýymen «Qyran elim – Qazaqstan» fleshmoby ótedi.

25 qazan kúni saǵat 10:00-de «Ulttyq dala oıyndary» respýblıkalyq ulttyq sport túrleriniń festıvali ótedi. Ótetin orny – Omarov kóshesi, 10a mekenjaıdaǵy Almaty ıppodromy.

25 qazan kúni saǵat 17:00-de qazaqstandyq estrada juldyzdarynyń qatysýymen «Astana» alańynda merekelik kontsert ótedi.

Kontsertten keıin merekelik salıýt bolady.