Almatyda Ramazan aıynda taraýyq namazy meshitterde jamaǵatpen oqylmaıdy

ALMATY. QazAqparat- Pandemııaǵa baılanysty musylmandar úshin qasıetti Ramazan aıynda meshitterde jamaǵatpen namaz oqylmaıdy. Bul týraly onlaın brıfıng barysynda qalanyń bas ımamy Erkinbek Shoqaı aıtty, dep habarlaıdy QazAqparat tilshisi.

Almatynyń bas ımamy Erkinbek Shoqaı musylman qaýymyn kele jatqan qasıetti Ramazan aıymen quttyqtady.

«Bizdiń halqymyz ejelden Ramazandy erekshe qasterlep: «On eki aıdyń sultany»,- dep ataǵan. Berekesi mol aıda jaramazan jyryn aıtyp, orazanyń kelgenin qýanyshpen jetkizip, nasıhattaǵan», - dedi Erkinbek Shoqaı.

Imam qala meshitterinde jamaǵatpen taraýyq namazy oqylmaıtynyn tilge tıek etti.

«Alǵashqy taraýyq namazy búgin oqylady. Bıyl da qalamyzdaǵy epıdahýaldyń kúsheıýine baılanysty meshitterde jamaǵatpen taraýyq namazy oqylmaıdy», - dedi qalanyń bas ımamy Erkinbek Shoqaı.

Spıker, árkim taraýyq namazyn óz shańyraǵynda otbasy múshelerimen oqýyna keńes berdi. Biz osylaı oqshaýlaný arqyly juqpaly indetti jeńemiz.

Aıta keteıik, 2021 jyldyń qasıetti Ramazan aıy 13 sáýirde bastalyp, 12 mamyrda aıaqtalady.

8 mamyrdan 9 mamyrǵa qaraǵan tún - qasıetti Qadir túni. 13 mamyr - Oraza aıttyń birinshi kúni.