Almatyda Prezıdent Joldaýynyń mindetterin iske asyrý talqylandy
Aktıv otyrysyna qala ákiminiń orynbasarlary, máslıhat depýtattary, Qoǵamdyq keńes, úkimettik emes uıym, bıznes-qaýymdastyqtar men jastar uıymdarynyń ókilderi qatysty.
Baqytjan Saǵyntaev Prezıdent Qasym -Jomart Toqaev óz Joldaýynda halyq pen memlekettiń múddelerin qorǵaýǵa negizdelgen ekonomıkanyń, áleýmettik salanyń, ishki jáne syrtqy saıasattyń barlyq negizgi máseleleri boıynsha óz ustanymyn bildirgenin atap ótti.
«Ekonomıkalyq salada Almaty ákimdigi jumysynyń basymdyqtary kásipkerlikti damytý, ınflıatsııaǵa qarsy áreket etý, memlekettik qarjyny tıimdi basqarý, qala ekonomıkasynyń turaqty ósýin qamtamasyz etý», - dep atap ótti megapolıs ákimi Baqytjan Saǵyntaev.
Pandemııa saldarynan bolǵan qıyndyqtarǵa qaramastan, qala ekonomıkasy qalpyna kelýdiń joǵary qarqynyn kórsetýde. Qysqa merzimdi ekonomıkalyq ındıkator 109,1 paıyz boldy. Shaǵyn jáne orta bıznesti qoldaý úshin daǵdarysqa qarsy sharalar qabyldandy, mysaly, salyqtan jaldyq tólemderden bosatý, nesıe boıynsha paıyzdyq mólsherlemeni keıinge qaldyrý jáne sýbsıdııalaý.
Jyl basynan beri «Bıznestiń jol kartasy - 2025», «Eńbek», «Qarapaıym zattardyń ekonomıkasy», «QHA», «Almaty bıznes - 2025» sııaqty baǵdarlamalardyń arqasynda jalpy quny 191,6 mlrd teńge bolatyn 1,2 myńnan astam joba maquldandy. Bul 2,5 myńnan astam jumys ornyn ashýǵa múmkindik berdi.
«Bul baǵdarlamalar ózderiniń tıimdiligin kórsetti. Memleket basshysy «Qarapaıym zattardyń ekonomıkasy» jáne «Bıznestiń jol kartasy» baǵdarlamalarynyń merzimin 2022 jylǵa deıin uzartý týraly sheshim qabyldady. Sondyqtan qala ákiminiń orynbasarlary qajetti sharalardy qabyldaýy tıis», - dedi Almaty ákimi.
Prezıdent ekonomıkany odan ári dıversıfıkatsııalaý, óndiriletin taýarlar assortımenti men eksport geografııasyn keńeıtý mindetin qoıdy. 2021 jyldyń qańtar-mamyr aılarynda júrgizilgen jumystyń arqasynda Almaty qalasynyń shıkizattyq emes eksport kólemi 813 mıllıon AQSh dollarǵa jetip, 32,8%-ǵa ósti. Bul jumys, eń aldymen, eksportqa baǵyttalǵan jańa óndiristerdi iske qosý turǵysynan kúsheıtiletin bolady.
Baqytjan Saǵyntaev ınflıatsııany 4-6% dálizge qaıtarý boıynsha Prezıdent qoıǵan mańyzdy áleýmettik tapsyrmaǵa sáıkes baǵanyń ósýin tejeý sharalaryn jalǵastyrýdy tapsyrdy.
«Almatyda tamyz aıyndaǵy tutyný baǵasynyń ındeksi jyl basynan beri 105,6% boldy. Bul qalada júzege asyrylǵan birqatar keshendi jáne jedel sharalardyń arqasynda múmkin boldy. Osylaısha, «keri» syzbany qoldaný Almatyǵa azyq-túlik taýarlarynyń 15 túrin turaqty baǵamen qamtamasyz etýge múmkindik berdi. Oǵan iri saýda jelileri men azyq-túlik óndirýshileri qatysady. Jeti azyq-túlik bazarynda «áleýmettik dúkender» ashyldy, onda keıbir ónimderdiń baǵasy naryqtaǵy ortasha baǵadan 5-40%-ǵa tómen»,- dep atap ótti ákim.
Onyń aıtýynsha, alda turǵan basty mindet – Almatyda kóterme-bólý ortalyqtarynyń jelisin qurý. Óndirýshiler tek saýda jelilerine ǵana emes, sonymen qatar ónimdi saqtaý, tasymaldaý sııaqty tehnologııalyq operatsııalarǵa qoljetkizýi kerek. Nátıjesinde deldaldar tizbegi qysqarady.
«Alataý aýdanynda Ulttyq saýda-taratý jelisiniń ortalyǵynyń qurylysyna 17 gektar jer telimi bólindi. Qurylys qarasha aıyna josparlanǵan, paıdalanýǵa berý merzimi - 2023 jyl»,- dedi Baqytjan Saǵyntaev.