Almatyda Prezıdent saılaýyna qatysty tegin Call-ortalyq iske qosyldy

ALMATY. QazAqparat - Almaty qalasy boıynsha «1315» biryńǵaı nómiri bar Call-ortalyq iske qosyldy, dep habarlaıdy QazAqparat Almaty qalasy ákimdiginiń baspasóz qyzmetine silteme jasap.

Ákimdiktiń málimetinshe, biryńǵaı nómir arqyly 20 qarashada ótetin Qazaqstan Respýblıkasy Prezıdentiniń kezekten tys saılaýynda daýys berýge arnalǵan saılaý ýchaskesiniń mekenjaıy men nómirin tekserýge bolady.

«Biryńǵaı nómir barlyq uıaly baılanys operatorlarynyń abonentteri úshin qońyraý shalý tegin. Call-ortalyqtyń jumys ýaqyty – demalys kúnderin qosa alǵanda, kún saıyn saǵat 8.00-den 20.00-ge deıin»,- delinedi habarlamada.

Sondaı-aq ákimdikte Almaty qalasy ákimdiginiń «Open Almaty» qoǵamdyq qabyldaýynyń saıty men bilim basqarmasynyń memlekettik qyzmetter portalynda saılaýshylar tiziminde ózin tekserýge múmkindik beretin servıs qoljetimdi ekenin habarlady.

Osyǵan uqsas qyzmet Telegram Bot arqyly da iske qosyldy.