Almatyda praımerız qatysýshylary úgit-nasıhattyń alǵashqy kúninde 100-den astam is-shara ótkizdi

ALMATY. QazAqparat - Búgin búkil el boıynsha partııaishilik praımerız kandıdattary úgit-nasıhat jumystaryna kiristi. Almaty boıynsha úgit-nasıhat jumystaryna 230 úmitker qatysyp jatyr, onyń ishinde 185 adam - máslıhatqa, 45 adam - Májiliske úmitker, dep habarlaıdy QazAqparat tilshisi.

Qalanyń keıbir aýdandarynda bir depýtattyq orynǵa 10-nan astam qatysýshy úmitker.

«Nur Otan» partııasy Almaty qalalyq fılıaly tóraǵasynyń birinshi orynbasary Stanıslav Kankýrovtyń aıtýynsha, qatysýshylardyń ortasha jasy 42 jasta. Úmitkerlerdiń ishinde 81 áıel (35,2%) bar. Al jasy 35-ke tolmaǵan - 72 adam bar (31,3%).

Almaty shaǵyn jáne orta bıznes pen úkimettik emes uıymdar ókilderiniń ishinen praımerızge qatysýshylar sanynan respýblıka boıynsha kósh bastap tur.

«Qazirgi tańda Almaty qalasy shaǵyn jáne orta bıznes sýbektileri ókilderiniń sany boıynsha kósh bastap tur. ShOB sektory 53%, bızneste 122 praımerız qatysýshy, al úkimettik emes uıymdardan 33 adam ótinim berdi, bul 14,3% bolyp tur» - dedi «Nur Otan» partııasy qalalyq fılıaly tóraǵasynyń birinshi orynbasary Stanıslav Kankýrov.

Esterińizge sala keteıik, úmitkerlerdiń úgit-nasıhat jumystary bastaýysh partııa uıymdarynyń tóraǵalarymen ZOOM arqyly onlaın-kezdesýler, ashyq alańdarda nemese sanıtarııalyq normalardy qatań saqtaı otyryp, jeldetiletin bólmelerde oflaın-kezdesýler arqyly júrgiziletin bolady. Sondaı-aq, «Nur Otan» partııasy fılıaldarynyń resmı akkaýnttary arqyly tikeleı efır ótkiziledi.

Budan bólek, 14-30 qyrkúıek aralyǵynda Almatynyń ár aýdanynda praımerız qatysýshylary pikirsaıysqa qatysady. Ol úshin ashyq túrde jerebe tastaý jáne qatysýshylardy bólý júrgiziledi. Kezeń 3 qazanǵa deıin jalǵasady. Nátıjeler osy jyldyń 5 qazanynda belgili bolady.

Jeńimpazdar máslıhattar men Parlament depýtattyǵyna kandıdattardyń partııalyq tizimderinde bolady.