Almatyda polıtsııanyń servıstik ortalyqtary ashylady
Qazir megapolıstiń turǵyndary men qonaqtary ártúrli máseleler boıynsha aýdandyq polıtsııa bólimderiniń janyndaǵy front-ofısterge júginedi. Bul kelýshiler úshin de, qyzmetkerler úshin de yńǵaısyz. Sebebi munda beıbit turǵyndardan bólek, qylmys jasady dep tanylǵan kúdiktiler jetkizilip, probatsııa esebinde turǵan sottalǵandar da keledi. Eńbek mıgranttarynyń da qarasy qalyń.
Sonymen qatar polıtsııa ǵımarattary rejımdik nysan bolǵandyqtan azamattar tolyq tekserýden ótýge májbúr, uıaly telefondary ýaqytsha alynyp, qyzmetker birge erip júrýi mindetti.
Prezıdenttiń servıstik ortalyqtar qurý jónindegi tapsyrmasyn oryndaý maqsatynda ІІM jáne Almaty qalasy ákimdigi ókilderiniń qatysýymen jumys kezdesýi ótti.
«Atalmysh jobanyń tujyrymy – «klıentke» baǵdarlaný. Búginde ІІM baǵalaý ındıkatorlaryn ózgertip jatyr. Sondyqtan da qajetti jańa tásilder azamattarymyzdyń kóńilinen shyǵýy tıis», – dedi mınıstr Marat Ahmetjanov.
Vedomstvo polıtsııa qyzmetterin kórsetýdiń úsh deńgeıli modelin ázirledi.
Birinshi deńgeı – modýldik beketter. Bul «polıtsııa qadamdyq qol jetimdilikte» qaǵıdatyn iske asyrýdyń jarqyn mysaly. Mundaı nysandar táýlik boıy kóshedegi adamdardyń qaýipsizdigi úshin jumys isteıdi.
Ekinshi deńgeı – ýchaskelik polıtsııa pýnktteri. Qazirgi ýaqytta el boıynsha 2700-den astam pýnkt jumys isteıdi. Jańa formattaǵy úsh nysan Astana, Pavlodar jáne Aqtóbe qalalarynda ornalasqan. Olardyń negizgi «klıentteri» shaǵynaýdandardyń turǵyndary bolyp tabylady.
Úshinshi deńgeı – ótinish berýshiler men qyzmet alýshylarǵa arnalǵan polıtsııanyń servıstik ortalyqtary. Servıstik ortalyqtarda tegin 55 túrli qyzmet kórsetiletin bolady. Polıtsııa tarapynan kóshi-qon, ákimshilik zańnama jáne quqyq buzýshylyqtyń aldyn alý salasyndaǵy mamandar ornalastyrylady.
Budan basqa onda medıator, zań qyzmetterin kórsetý jónindegi konsýltant jáne psıholog jumys isteıtin bolady. Áıelderdiń quqyqtaryn qorǵaý jónindegi qyzmetter usynylyp, ІІM joǵary oqý oryndaryna oqýǵa jáne ІІO-ǵa jumysqa qabyldaý boıynsha keńester beriledi. Servıstik ortalyqtardyń negizgi maqsaty – qoǵammen ashyq dıalog quryp, halyqtyń suranysyna jedel den qoıý, qala turǵyndary men qonaqtaryna kásibı, bilikti kómek kórsetý.