Almatyda polıtseılerdiń kólikterin qıratqandarǵa qatysty tergeý aıaqtaldy

NUR-SULTAN. QazAqparat – Almatyda polıtseılerdiń kólikterin qıratqan úsh adamǵa qatysty tergeý aıaqtaldy. Bul týraly QR Bas prokýratýrasy Qylmystyq qýdalaý qyzmeti basshysynyń orynbasary Eldos Qılymjanov málim etti, dep habarlaıdy QazAqparat tilshisi.

«Almaty qalasynda arnaıy prokýrorlar 3 adamǵa qatysty sotqa deıingi tergep-tekserýdi aıaqtady. Olar jappaı tártipsizdikterge qatysqany, memlekettik organdardyń ǵımarattaryna shabýyl jasaǵany jáne bılik ókilderine kúsh qoldanǵany úshin kúdikke ilindi», - dedi Eldos Qılymjanov Ortalyq kommýnıkatsııalar qyzmetinde.

Onyń aıtýynsha, kúdiktiler qańtardyń 4-inen 5-ine qaraǵan túni Almaty qalasynyń ortalyq alańynda bolyp, basqa adamdarmen toptasa polıtsııanyń 42 qyzmettik avtokóligin qıratqan.

«Túrli quraldarmen qarýlanyp, quqyq qorǵaý qyzmetkerlerine qatysty zorlyq-zombylyq áreketterin jasady. Sodan keıin ákimdik ǵımaratyna shabýyl jasaýǵa jáne órteýge belsendi túrde qatysty. Olardyń osy qylmystarǵa qatystylyǵy beınekamera jazbalarymen, kýágerlerdiń jaýaptary jáne saraptamalyq zertteýlermen rastalady. Qylmystyq is aıyptaý aktisimen sotqa joldandy», - dedi Bas prokýratýra ókili.

Budan buryn habarlanǵandaı, qazirgi kezde arnaıy prokýrorlardyń is júrgizýinde jappaı tártipsizdikter boıynsha 53 jáne terrorızm aktilerine qatysty 32 qylmystyq is bar .