Almatyda pitir sadaqa qabyldaıtyn termınaldar ornatyldy
04:36, 20 Mamyr 2017
ALMATY. QazAqparat - Almatylyqtar termınaldar arqyly pitir sadaqa bere alady. Mundaı qondyrǵylar Ortalyq meshittiń janyna qoıyldy, dep habarlaıdy QazAqparat.
«Búgingi kúni Bes ınstıtýtsıonaldy reformany júzege asyrý barysynda memlekettik organdar qoǵam aldynda barynsha ashyq bolýda jáne esep berýde. Almatyda aýrýhanalar, mektepter, balalar baqshalary, PIK-ter ózderiniń qarjylyq esepterin jarııalap, qalalyqtar senimine ıe bolýda. Mine, endi, Almaty meshiti de alǵashqylardyń biri bolyp osy jolmen júre bastady», - dedi qala ákimi Baýyrjan Baıbek.
Ortalyq meshittiń Bas ımamy Nurbek Esmaǵanbetov bul tehnologııanyń ilki rejimde qoldanylatynyn aıtty. Burynnan qalyptasqan ádis te qoljetimdi, meshitke kelgen kez kelgen jan qaıyrymdylyq tólemderin jáshikterge sala alady. Aı saıynǵy jınalǵan qarjynyń jalpy somasy meshittiń saıtynda jarııalanady.