Almatyda páter ıeleri kooperatıvterine 3 mln teńge aıyppul salyndy

ALMATY. QazAqparat - Ótken jyldyń qorytyndysy boıynsha PIK-ge toqsandyq esepterdiń bolmaýy jáne ár úı úshin aǵymdaǵy jınaq shottarynyń joqtyǵy úshin 3 mıllıon teńgege jýyq aıyppul salyndy. Bul týraly Almaty qalalyq turǵyn úı saıasaty basqarmasy basshysynyń orynbasary Meıirjan Otynshıev aıtty, dep habarlaıdy QazAqparat tilshisi.

«Almatyda 8400 kóppáterli turǵyn úı bar. Olarǵa 900 basqarý organdary qyzmet etedi. Páter ıeleri kooperatıvterine shaǵym kóptep túsedi. Turǵyndardyń kóppáterli úıge kórsetiletin qyzmet sapasyna kóńilderi tolmaıdy. ıAǵnı jumsalǵan aqshaǵa esep bermeý, ár úı úshin aǵymdaǵy jınaq shottarynyń bolmaýy, turǵyndardyń kelisiminsiz maqsatty shyǵyndardyń ulǵaıýy turǵyndardyń narazylyǵyn týdyrdy. Olarda basqarý mekemelerine degen senim qalmaǵan. Sonymen qatar, lıft, baspaldaq, kireberis, jertóle sanıtarlyq talapqa saı emestigin de jıi estımiz»,– deıdi Meıirjan Otynshıev.

Onyń aıtýynsha, basqarmaǵa kelip túsken ótinishterdiń negizinde 300 jospardan tys tekserý júrgizildi, anyqtalǵan buzýshylyqtardy joıý týraly 154 uıyǵarym shyǵarylyp, 47 ákimshilik hattama toltyryldy.

«Júrgizilgen tekserýdiń qortyndysy boıynsha, toqsandyq esepteri men ár úı úshin aǵymdaǵy jınaq shottary joq páter ıeleri kooperatıvterine 3 mln teńgege jýyq aıyppul salyndy»,- dep qortyndylady ol.