Almatyda Parlament depýtattary «Ashyq esik» kúnine qatysty
Áýezov aýdandyq Halyqqa qyzmet kórsetý ortalyǵynda ótken qabyldaýǵa Parlament depýtattary men birqatar memlekettik organdardyń laýazymdy ókilderi qatysty.
Quzyrly organdardyń ókilderi ártúrli máselemen júginip kelgen azamattarǵa keńes berdi. Qoǵamdyq qabyldaý ótetini jaıly áleýmettik jelilerde aldyn ala habarlanǵandyqtan, atalmysh kezdesýge almatylyqtar kóptep jınaldy.
Turǵyndar tek memlekettik qyzmetter ǵana emes, tolǵandyrǵan basqa da kóptegen máselelermen keldi. Solardyń biri, qala turǵyny, 3-top múgedegi Natalıa esimdi azamat, páteri birinshi qabatta bolsa da, úıdiń lıftin paıdalaný boıynsha 300 myńnan asa bereshek jınalyp qalǵanyn aıtyp shaǵymdansa, taǵy bir arbadaǵy azamat qaladaǵy kóp nysandarda pandýstardyń joqtyǵyn alǵa tartty. Endi bir turǵyn úı mańynda ashylǵan kólik turaǵynyń kúni-túni turǵyndar tynyshtyǵyn alatynyn aıtyp shaǵymdandy. Bul máselelerdi Áýezov aýdandyq ákimi apparatynyń basshysy Dáýren Halyqov óz qaperine aldy.
Ieligindegi jerine jańa akt alǵan azamat, eki jyl ótse de eskisi notarıýs bazasynan shyǵyp turǵanyn, jańasyn alǵanda eskisi nege joıylyp ketpegenin aıtsa, ekinshi bir turǵyn páterinde ózge adamdardyń tirkelip turǵanyn, ol úshin kommýnaldyq tólem tólegenin, endi sol tólemderdi qaıtarý jolyn bilýge kelgen. Bul azamattardyń máselesin anyqtaǵan «Azamattarǵa arnalǵan úkimet» MK Almaty fılıalynyń dırektory m.a. Abdýrasýl Kýldashov, elektrondyq aqparattyq bazalardan ketken qatelikter ekenin, oǵan HQO mamandarynyń qatysy da, qoljetimdiligi de joq ekenin aıtty.
«Turǵyndar qujattaryn HQO-ǵa ótkizip, osy jerden nátıjesin alatyndyqtan, barlyq qıyndyqtar men qatelikterge HQO mamandaryn kinalap jatady. Biraq, ol qujattardyń barlyǵy tıisti ýákiletti organdarda óńdelip, daıyn bolǵanda HQO-ǵa keledi. Qatelikter, bastartýlar sol ýákiletti organdar tarapynan bolýy múmkin. Sondyqtan qyzmet alýshylardyń shaǵymdaryn qanaǵattandyrý úshin tıisti memlekettik organdarmen jumys istep, máseleleriniń oń sheshilýine yqpal etemiz. Osyndaı qabyldaýlar da sol úshin uıymdastyrylýda», - dedi Abdýrasýl Kýldashov.
Azamattardyń áleýmettik qamsyzdandyrý, jer kadastryn tirkeý, jyljymaıtyn múlikke quqyqtardy tirkeý, zańdy tulǵalardy tirkeý máseleleri boıynsha suraqtaryna Azamattarǵa arnalǵan úkimet mamandary jaýap berdi. Keıbir ótinish ıeleriniń máseleleri boıynsha jaýapty mekemelerge tapsyrmalar berilip, oryndalýy baqylaýda bolatyny eskertildi.
Birqatar ótinishterdi májilismen Elnur Beısenbaev tıisti mınıstrlikterge másele qoıyp, sheshilýine atsalysatynyn málimdedi.
«Halyq únine qulaq asatyn memleket» qaǵıdatyn iske asyrý sheńberindegi mundaı qabyldaýlar ózge aýdandarda da jalǵasady. Biz aldaǵy qabyldaýlarǵa memlekettik organdardy kóptep tartatyn bolamyz. Búgingi kúnderi 4-5 memlekettik mekeme ókilderi qatyssa, kelesi joly olardyń qatary ósedi. Sebebi, suraqtarmen kelip jatqan azamattardyń máselelerin der kezinde sheshý úshin, tıisti mekeme ókilderiniń qatysý qajettiligi týyndap otyr», - dedi Memlekettik qyzmet isteri agenttigi Almaty qalasy departamentiniń basshysy Ildar Úısimbaev.
Ashyq esik kúnine kelgen 100-den asa azamat suraqtaryn bılik ókilderine betpe-bet otyryp qoıa aldy.