Almatyda paramen ustalǵan ekologııa sheneýnikteri 265 mln teńge aıyppul tóleıdi
«Almaty qalasy Medeý aýdanynyń № 2 sotynyń úkimimen para alǵany úshin Almaty qalasy ekologııa jáne qorshaǵan orta basqarma basshysy orynbasarynyń mindetin ýaqytqa atqarýshy M. Jeksembaevqa 96 mln teńge somasynda aıyppul túrinde jaza taǵaıyndaldy (paranyń 30 eselengen mólsheri). Para bergeni úshin «Ekoservıs-S» JShS basshysy Ǵ. Berkinbaev pen «Kompanııa Stroıteks» JShS basshysy A. Mapaevqa sáıkesinshe 73 mln astam jáne 64 mln teńge somasynda aıyppul salýǵa úkim shyǵaryldy. Paraqorlyqqa deldal bolǵany úshin «Eco Almaty» JShS menedjeri B. Rahym 32 mln teńge mólsherinde aıyppulǵa sottaldy. Sottalǵandar úshin aıyppuldyń jalpy esebi 265 mln teńgeden astam somany qurady», - delingen Agenttik habarlamasynda.
Atalǵan adamdar memlekettik qyzmette jáne kvazımemlekettik sektor sýbektilerinde qyzmet atqarý quqyǵynan ómir boıy aıyryldy.
Sondaı-aq Ekologııa jáne qorshaǵan orta basqarmasynyń laýazymdy tulǵasy M. Jeksembaev «Rennesans plıýs» JShS ókili Ǵ. Berkinbaevtan qatty-turmystyq qaldyqtardy jınaý jáne suryptaý úshin Almaty qalasynyń turǵyn úı keshenderiniń aýmaǵynda jer ýchaskelerin bergeni úshin 5 mln teńge shamasynda aqshalaı qarajat aldy. M. Jeksembaev «Kompanııa Stroıteks» JShS dırektory A. Mapaevtan Almaty qalasy Ekologııa jáne qorshaǵan orta basqarmasynyń ákimshilik ǵımaratynyń JSQ ázirleýge buryn jasalǵan memlekettik satyp alý týraly shart boıynsha jalpy qamqorlyǵy úshin deldal B. Rahym arqyly 3 mln teńgeden astam aqshalaı para aldy.
QR QK 41-babyna sáıkes aıyppul belgilengen merzimde tólenbegen jaǵdaıda jaza sharasy bas bostandyǵynan aıyrýǵa aýystyrylady.