Almatyda pandemııa jaǵdaıyndaǵy JOO-lardyń jumys formaty talqylandy
Kezdesý Almaty óńiri rektorlary keńesiniń bastamasymen ótti.
Onlaın-kezdesýdiń jumysyn Almaty óńiri rektorlar keńesiniń tóraǵasy, Abaı atyndaǵy QazUPÝ rektory Tákir Balyqbaev ashty. Ol pandemııa kezinde JOO qyzmetin uıymdastyrýǵa qatysty birqatar ózekti máselelerdi atap ótti.
Sondaı-aq basqosýda bolashaq stýdentterdiń qujattaryn qabyldaý, túsý emtıhandaryn ótkizý jáne túlekterge dıplom tapsyrý sııaqty aspektilerdi qosa alǵanda, jumys formaty talqylandy.
Jandarbek Bekshın Almaty boıynsha epıdemıologııalyq jaǵdaıdy aıtty. Qalada koronavırýstyń ortasha kórsetkishi sońǵy aptada 2%-dan aspaı tur.
Osyǵan baılanysty joǵary oqý oryndarynyń basshylyǵy sanıtarlyq-epıdemıologııalyq talaptardy, maskalyq rejımdi jáne áleýmettik qashyqtyqty qatań saqtaýy qajet. Kópshilik jınalatyn oryndarǵa barýdan jáne mádenı-buqaralyq is-sharalardy uıymdastyrýdan bas tartý jóninde usynystar aıtyldy. Joǵary oqý oryndarynyń qyzmetin uıymdastyrý kezinde oqý korpýstaryn jeldetý júıesimen turaqty qamtamasyz etý qajet.
Kezdesýge qatysýshylar oqýshylardyń jazǵy demalysyn uıymdastyrý, qabyldaý komıssııasynyń jumysy jáne dıplom tapsyrý rásimin ótkizý máselelerin kóterdi. Óz usynystarymen QazUPÝ rektory Tákir Balyqbaev, «Turan» ýnıversıtetiniń rektory Rahman Alshanov, «NARHOZ» ýnıversıtetiniń ákimshilik máseleler jónindegi prorektory Kamılıa Amenova, Almaty menedjment ýnıversıtetiniń rektory Erbol Súleımenov, Halyqaralyq bilim berý korporatsııasynyń rektory Erik Besimbaev, Halyqaralyq bıznes ýnıversıtetiniń prezıdenti Darhan Ahmed-Zakı sóz sóıledi. Onlaın-kezdesý jumysyna barlyǵy 39 JOO ókili qatysty.
Almatynyń bas sanıtarlyq dárigeri joǵary oqý oryndarynyń rektorlarymen birlese otyryp, epıdemıologııalyq qıyn jaǵdaıda joǵary oqý oryndarynyń odan ári jumys isteý algorıtmi men nusqaýlyqtaryn ázirleý boıynsha jumys tobyn qurýdy sheshti.