Almatyda Ózbekstan azamaty bes aı boıy avtobýsty júrgizýshilik kýáliginsiz basqaryp kelgen

ASTANA. QazAqparat - Jolaýshylar tasymalyndaǵy qaýipsizdik sharalaryn óreskel buzýshylyqtarǵa jol berilýde. Bul týraly búgin Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi Úılestirý keńesiniń jınalysynda QR Bas prokýrory Ashat Daýylbaev málim etti.

«Jolaýshylar tasymalyndaǵy qaýipsizdik máselelerine aıryqsha mán berý kerek. Osy salada qaýipsizdik tehnıkasynyń talaptaryn óreskel buzý oqıǵalaryna jol berilip, onyń saldary qaıǵyly jaǵdaılarǵa alyp kelýde. Ótken jyly Astanada baǵdarly avtobýsty mas kúıinde basqarǵan júrgizýshi ustaldy jáne elimizdiń aýmaǵynda osyndaı oqıǵalar oryn alýda»,- dedi Bas prokýror.

Onyń aıtýynsha, Almatyda Ózbekstan azamaty bes aı boıy reıstegi avtobýsty júrgizýshilik kýáliginsiz basqaryp kelgen.

Sonymen qatar A.Daýylbaev tıisti ruqsat qujatarynsyz jolaýshylar tasymaldaıtyndarǵa jeke toqtaldy. Tek Astananyń avtovokzalynda tıisti ruqsat qujattarynsyz 28 tasymaldaýshy anyqtaldy. Osyndaı faktiler elimizdiń barlyq oblystarynda baıqalýda.

«Sáıkesinshe, osyndaı tasymaldaýlardyń nátıjesinde jolaýshylardyń qaýipsizdigi saqtalmaıdy», - dep atap ótti A.Daýylbaev.