Almatyda otandyq taýar óndirýshilerdiń kórmesi ótip jatyr
Búgin kórmeniń ashylýyna qala ákimi Erbolat Dosaev qatysty.
«Ulttyq Ónim» kórmesin ótkizý – Almaty men jalpy el úshin mańyzdy oqıǵa. Almatyda búginde shaǵyn jáne orta bıznes qalalyq jumyspen qamtýdyń 87% úlesin ala otyryp, qala ekonomıkasynyń 57,5% quraıdy. Ótken jyly ShOB sýbektileriniń ónim shyǵarý kólemi 15,7 trln teńgege jetip, 31,1% ósimdi kórsetti.
Sondaı-aq qalada jyl basynan beri iskerlik belsendiliktiń aıtarlyqtaı ósýi baıqalady. Bıylǵy jyldyń birinshi toqsanynda iskerlik belsendilik ındeksiniń deńgeıi boıynsha (57,9%) Almaty Qazaqstan óńirleri arasynda birinshi orynǵa shyqty. Qysqa merzimdi ekonomıkalyq ındıkator 23,9% artty.
Sonymen birge memlekettik jáne qalalyq baǵdarlamalar aıasynda basym baǵyttaǵy 3 myńnan astam jobany qoldaý úshin bıyl 44 mlrd teńge bólindi», - dedi Erbolat Dosaev. Aıta keteıik, «ULTTYQ ÓNIM» kórmesine 300-den astam otandyq, onyń ishinde 30 almatylyq kompanııa qatysady. Olar tamaq, qurylys, jıhaz, toqyma ónerkásibi, kádesyı jáne taǵy da basqa ónimder óndiredi. Kórme 5-7 mamyr aralyǵynda «Atakent» ortalyǵynyń 11-shi pavılonynda ótedi.