Almatyda otandyq óndirýshilerdiń kórmesi bastaldy

ALMATY. QazAqparat - Otandyq óndirýshilerdiń kórmesine qatysýǵa 77 kásipker ótinim bildirgen. Olardyń arasynda saýda, qyzmet kórsetý, mashına jasaý, metallýrgııa, tamaq jáne jeńil ónerkásip mamany bar, dep habarlaıdy QazAqparat tilshisi.

Almaty qalasy kásipkerler palatasynyń dırektory Aıtýar Qoshmambetovtyń aıtýynsha, búgingi kórme - «Qazaqstanda jasalǵan» óndiristiń, tutastaı ekonomıka damýynyń naqty kórsetkishi.

«Otandyq óndiris tóńireginde kóp syn aıtylady. Tipti, jergilikti óndiris joq deıtinder bar. Meniń aıtarym, óndiris salasy jyldan-jylǵa ósip, damyp keledi. Osy bastamalardy palata, memleket, qoǵam retinde birlesip, qoldaý kórsetip qana ilgerilete alamyz», - dep atap ótti ashylý saltanatynda Almaty qalasy kásipkerler palatasynyń dırektory Aıtýar Qoshmambetov.

Kórmege qatysyp jatqan almatylyq óndirýshiler saýda, qyzmet kórsetý, mashına jasaý, metallýrgııa, tamaq ónerkásibi, jeńil ónerkásip salalarynda eńbek etedi.

«Kásipkerlik – aýyr jol. Kásipkerler – bizdiń qyzmetkerlerge jumys beretin, bizdiń memleketke salyq tóleıtin, búkil álemge tanymal qazaqstandyq ónimdi shyǵaratyn adamdar. Búgin osy «Qazaqstannyń úzdik taýary» kórmesinde almatylyq úzdik taýar óndirýshiler usynylady. Qazaqstandyq óndirýshilerdiń nátıjeleri barshamazdy shabyttandyrsyn», - dep atap ótti Almaty qalasy Óńirlik keńesiniń tóraǵasy Maksım Baryshev.

Óńirlik kórme-baıqaý: «Óndiristik maqsattaǵy úzdik taýarlar», «Halyqqa arnalǵan úzdik taýarlar», «Úzdik azyq-túlik taýarlary» úsh nomınatsııa boıynsha ótedi.

Ár nomınatsııada úsh jeńimpaz anyqtalady.

Al, 31 shilde kórme-baıqaýdyń jeńimpazdaryn marapattaý rásimi uıymdastyrylady. Óńirlik irikteý jeńimpazdary elordada Qazaqstan Respýblıkasy Prezıdentiniń qatysýymen ótetin respýblıkalyq baıqaýǵa joldama alady.

Aıta kekteıik, Almatyda 295 myńnan astam shaǵyn jáne orta bıznes jumys isteıdi. Ótken jylmen salystyrǵanda 28,5 paıyz artqan.