Almatyda Otan qorǵaýshy kúnine oraı merekelik sharalar ótti

ALMATY. QazAqparat- Otan qorǵaýshylar kúnine arnalǵan merekelik shara 28 gvardııashy-panfılovshylar saıabaǵynda ótti, dep habarlaıdy QazAqparat tilshisi.

Dańq memorıalyna júzdegen áskerı jáne ishki ister organdarynyń qyzmetkerleri, sondaı-aq olardyń jubaılary, balalary men ata-analary keldi.

Alańǵa túrli soǵysqa qatysqan ardagerler, qazirgi Otan qorǵaýshylar jáne áli oqyp júrgen jas jaýyngerler jınaldy.

Uıymdastyrýshylar Otan qorǵaýshylar kúni men Jeńis kúniniń jaqyndyǵy urpaqtar sabaqtastyǵyn beıneleıtinin atap ótti.

Sondaı-aq ishki ister, qorǵanys, tótenshe jaǵdaılar organdarynyń eńbegimen erekshe kózge túsken qyzmetkerleri alǵys hatpen marapattaldy.

Marapatty qala ákiminiń orynbasary Arman Qyryqbaev tapsyrdy.

«Búgin - osyndaı jarqyn jáne shýaqty kúnde Otan qorǵaýshylarymyzdy bultsyz kók aspan astynda qurmetteıtin uly mereke. Bizdiń áskerı, tártip saqshylary men arnaıy qyzmetterdiń basty mıssııasy – elde beıbitshilik pen tynyshtyqty saqtaý. Kúsh qurylymdary - bizdiń shekaramyzdyń qaýipsizdigi. Ári qaraı da solaı bolsyn», - dedi Arman Qyryqbaev.

Merekeniń resmı bóligi Saǵadat Nurmaǵambetov atyndaǵy Qurlyq áskerleri áskerı ınstıtýtynyń kýrsanttarynyń qarý-jaraqpen saptyq jattyǵýlarymen aıaqtaldy.

Sodan keıin qazaqstandyq estrada juldyzdarynyń qatysýymen merekelik kontsert bastaldy.

Otan qorǵaýshylarǵa Il Canto vokal kvarteti, Baǵdat Ábdiraıymov, Tolqyn Zabırova, Jámıla Serkebaeva óner kórsetti.